Shillong, Nailar 09: Ka Hynñiewtrep Border Dispute Redressal Forum (HBDRF) ha ka sngi Balang ka la pynpaw ba ka kwah ba ia ka kaphod tohkit jong ka Enquiry Commission ba la thung da ka Sorkar Meghalaya bad ka Sorkar Assam ban tohkit halor ka jingshah siat iap jong ki hynriew ngut ki briew ha ka shnong Mukroh kaba la jia ha ka 22 tarik u Naiwieng, 2022 dei ban aiti sha ka Central Bureau of Investigation (CBI) lane sha ka National Investigation Agency (NIA).
“Ngi kwah ba ia ka kaiphod tohkit dei ban aiti sha ki Central Agency jong ka Sorkar Pdeng ki bym don ka jingiashah liang la ka long sha ka CBI lane sha ka NIA,” ong u Secretary ka Forum u Bah Thomas Passah ha ka jingiakren bad ki lad pathai khubor.
Ka Sorkar Meghalaya ka la thung ia ka Enquiry Commission ba la khlieh da u nongbishar ba la shongthait jong ka Ingbishar Meghalaya High Court u Justice T. Vaiphei katba ka Sorkar Assam ruh ka la thung la ka jong ka Enquiry Commission ba la khlieh da ka nongbishar ba la shongthait jong ka Ingbishar Guwahati High Court ka Justice Rumi Kumari Phukan.
Haba pynpaw ka jingsngew lyngngoh ia ka jingkhot jong ka Enquiry Commission ba la thung da ka Sorkar Assam ia ki nongai sakhi na ka Jylla Meghalaya, u Bah Chandame Sungoh u la ong, “la lai sien laiwat ka (Enquiry Commission na ka jylla Assam) la khot. Ka Meghalaya ngi ioh jingtip ba ka la thung la ka jong ka Enquiry Commission bad ki la leh ruh la ka jong ka jingtohkit ba la khlieh da u Justice T. Vaiphei.”
“Na ka liang ka Assam katkum ka jingtip ba la ioh ka la ai sha ka Sorkar Meghalaya bad ka Sokar Meghalaya kam treh ban iashim bynta. Ka pynsah ia ngi ha ka umdum ba kumno kajuh ka jingjia kin don ar tylli ki Enquiry Commisison. Ka Sorkar Assam ngi tip ba kan pynksan beit la ka jong ka nia,” u la ong bad bynrap, “ki briew jong ngi kiba mad ia ki jingjia, kumno kin ioh ia ka hok ba ki dei ban ioh. Kata ka dei ka jingkylli ba ngi kwah ban buh ia ka Enquiry Commission. Kam ju don ka rukom ba ar tylli ki Enquiry Commision kin shong bishar ia kajuh ia ka kam.”
Haba kynnoh shuh shuh ia ka Sorkar Assam kan pynksan beit la ka jong ka nia, u Chairman jong ka Forum u la ong, “ha ka jingtokit jong ka Sorkar Assam ki don lai tylli ki daw ba ka pynieng la ka jong ka nia. Nyngkong eh, ngi iohi ba ka Mukroh ka la shah pynhap hapoh ka Jrikyndeng Police Station, West Karbi Anglong. Kane ka pyni shai kdar ba la kam jubor ia ka Mukroh sha Assam. Kaba ar, ka jingjia baroh ka dei na ka jingtuh dieng jong ki Khasi-Pnar na Karbi Anglong, Assam. Kaba lai, ka jingshah siat, ka jia tang na ka daw ka jingker kut jong ki paidbah ia ki Pulit bad ia ki nongpahara khlaw ka Sorkar Assam da kaba rah ruh ia ki tiar pynmynsaw bad ban iada ialade kim (Pulit) banse ban siat.”
