Shillong, Nailar, 01: Hadien ka jingjia ba dang shen ha ka shnong Umtyngngar, ki nongjngohkai pyrthei nabar ka jylla kiba kwah ban wan shangkai suwari sha ki jaka jngohkai pyrthei kiba don ha kane ka jylla mynta ki kylli shwa na ki nongpynïaid ïa ki jaka jngohkai pyrthei hato ka la shngaiñ neem ban wan sha Meghalaya?
Ïa kane la pyntip da u President jong ka Tour Operator Association of Meghalaya (TOAM) Bah Banlum Blah ha ka jingïakren bad ki lad pathai khubor hadien ka jingïakynduh bad u Myntri Rangbah ka Jylla u Conrad K. Sangma ha ka sngi Thohdieng ha kaba ïadei bad ka jingshah bat jong ki kali kamai Tourist ha ka shnong Umtyngngar dang shen ha ki dkhot jong ka Hynniewtrep National Youth Front (HNYF) East Khasi Hills District.
Na ka liang jong u President jong ka Meghalaya Rural Tourism Forum (MRTF) Bah Allan West Kharkongor u la ong ba kum ki kynhun kiba pynïaid ïa ki kam jngohkai pyrthei ha ka jylla ki la ai jingmut ruh sha ka Sorkar ban buh noh da ki Tourist Police khnang ba kan ym don kano kano ka jingshah pyndik jong ki briew kiba wankai nabar ka jylla sha ki jaka jngohkai pyrthei.
U la ïathuh ruh ba ki nongpynïaid ïa ki kam jngohkai pyrthei ha ki shnong nongkyndong ki mad ïa ka jingduhnong namarba ki nongjngohkai pyrthei ki la kyntait ban wan sha kane ka jylla hadien ka jingjia ha ka shnong Umtyngngar.
U la ong ba ka jingïakren bad u Myntri Rangbah ka long ruh ba ka Sorkar ka dei ban pynthikna ïa ka jingshngaiñ jong ki nongjngohkai pyrthei kiba wan nabar ka jylla bad ban pynthikna ruh ba ka jylla kan don hapdeng ka shong suk shongsaiñ.
