Shillong, Naitung 31: Uwei nonghikai skul u la shah kem khlem daw ha ki Pulit pahara khlaw ka tnat Forest ka jylla Assam ha kaba la tied bad bom ia u haduh ba ka met bad ki kti jong u ki la jngem snam.
U samla uba la shah kem bad shah bom dusmon u dei uba la tip kyrteng kum u Noreshor Timung, uba la don 28 snem ka rta na ka shnong Garo Banga, Amreng kaba don ha khappud jong ka Assam bad ka jylla Meghalaya kaba dang hap hapoh ka Jirang Constituency, Ri-Bhoi District.
Katkum ka khubor ba la iohlum la iathuh ba ha ka 30 tarik, Naitung, 2025 ki Pulit pahara khlaw jong ka tnad Forest Assam ki la kem ïa u Noreshor ha ka por kumba 2 baje haduh 3 baje nohphai sngi na shnong Umshalani khlem kano kano ka jingpynshai kaba biang ha kaba la shu thep beit ïa u ha kawei ka kali Bolero.
Ki paidbah bad ki bahaiing kiba la dawa ban pyllait noh ia une u nonghikai ki la ngat lang ha ka jingshah kawut lathi haduh ba ki la mynsaw.
U MLA jong ka Jirang Constituency u Bah Sosthenes Sohtun u la iakren ia u Deputy Commisisoner bad ia u Superintendent of Police ka Ri-Bhoi ba kin iakren bad ki bor synshar jong ka jylla Assam ba kin ai jingshai halor kane ka jingjia.
Hadien kane ka jingtuklar, la pyntip ba ka tnad Forest ka Assam ka la pynlait noh ïa u Noreshor Timung ha ka por janmiet ha kane hi kajuh ka sngi.
