New Delhi, Nailur, 27: Ka tnad Jngoh Kai jong ka Sorkar India ha ka sngi Thohdieng ka la pynbna ïa ki nongjop jong ka jingïakob “Best Tourism Villages Competition 2024,” ha ka World Tourism Day.
Ka shnong Umden bad Mawphlang ha Meghalaya ki la jop hapoh ki phang shna jingshna bad hiar pateng.
Ban kyntiew ïa ka kam jngoh kai ha ki shnong jong ka India, la sdang ïa ka jingïakhun Best Tourism Villages Competition ha u 2023. Ka jingpeit ka dei ban lap bad ai jingithuh ïa ki shnong kiba pynneh bad kyntiew ïa ki jingdon jingem ha ka deiriti bad ka mariang lyngba ki jingngeit tynrai ha ka imlang sahlang bad ka jingieng skhem na ka bynta ka jingïaineh ha baroh ki bynta.
Ka bynta kaba nyngkong jong ka jingïakhun Best Tourism Villages Competition ha u 2023 ka la ïoh ki application na 795 tylli ki shnong. Ha ka bynta kaba ar jong ka jingïakhun Best Tourism Villages Competition,la ïoh pdiang 991 tylli ki application na 30 tylli ki Jylla bad UT bad na kine 36 tylli ki shnong ki la ïoh jingithuh kum ki nongjop ha 8 tylli ki thup jong ka jingïakhun Best Tourism Villages competition 2024.
