Shillong, Nailar, 14: Ki khynnah skul jong ka Raid Shabonng Border Area Govt Secondary School ki jop ïa ka nam lahduh ha ka jingïakob ha ka Cluster Round jong ka lympung ïakob National STEM Challenge, kaba la pynlong da ka Brillio ryngkat ka jingïatreilang bad ka STEM Learning, kaba long ka shlem treikam kaba ïarap ban wanrah ki lad ki lynti ban weng ïa ki jingeh ba mad da ka imlang sahlang kaba la trei tyngeh ban kyntiew ïa ka jingai jinghikai jong ka STEM hapdeng ki khynnah skul.
Ïa ka wat jingïakhun jong ka Cluster Round, la pynlong ha Lumparing Vidyapeeth, Shillong. Ha kane ka sngi la pynkup burom ïa kine ki khynnah skul da ka kynhun jong ka STEM Learning bad ki nonghikai.
Kine ki nongjop mynta kin lah ban jam shuh sa sha kawei pat ka wat jong ka jingïakob bad kata ka long ka Zonal round, da kaba buh ïa ka thong ha khmat bad kata ka long ban ïakob na ka bynta ka wat jong ka phainal ha Bengaluru.
La pynlong ïa kane ka lympung kum ka jingsdang jong ka jingrakhe ba shisnem lynter ïa ki bynta bapher bapher STEM (science, technology, engineering, mathematics), ba kynthup ïa ka jingïakob shna ïa ki dur ne ki model ha ka subjek science bad mathematics model, kumjuh ruh ban shna ne pynkylla ïa ki jingshna kiba ïadei bad ka technology bad engineering.
Ka jingïakob jong ka Brillio National STEM Challenge ka dei ka jingïakob jong ka ri baroh kawei, da kaba wanrah ïa ka rynsan kaba paka bha ban ïoh jingtip shaphang ka STEM na ka bynta ki khynnah skul jong ki skul Sorkar bad ki skul kiba la ïoh jingïarap na ka Sorkar ha kylleng ka bynta jong ka India.
Kane ka sienjam treikam ka dei shi bynta jong ka jingtrei ba radbah jong ka Brillio ban kyntiew shuh shuh ïa ki sap ki phong jong ki khynnah. La saiñdur ïa kane ka lympung ba kan ktik ïa ka jingmut jingpyrkhat, ban pynlong ïa ki khynnah ba kin sei ïa ki buit thymmai, bad ban pynlong ïa ki khynnah naduh klass 6 haduh 10 ba kin pyndonkam ïa ka jingmut jingpyrkhat jong ki, kane ka lympung ka dei ka lympung kaba kynthup lang ïa baroh ki khynnah khlem da thew ki dei kiba wan na ka imlang sahlang ne ka longing longsem kaba kumno.
U Ashutosh Pandit, u nongseng jong ka STEM Learning, u ong, “nga sngewkmen ha kaba ïadei bad ka jingpynlong ïa ka ka lympung jong ka National STEM Challenge ha ka sien kaba saw bad ha kajuh ka por nga sngewkmen ban ïohi ïa ka jingïashim bynta jong kine ki khynnah kiba dang rit kiba la jam sha ka wat jong ka Zonal round. Ka STEM Learning ka dei ka shlem ai jinghikai ba la aiti na ka bynta ban nang kyntiew ïa ki jinghikai ha ki jaka kiba kham sha kyndong da kaba wanrah ïa ki rynsan ki ban lah ban sei ïa ki sap barieh jong ki khynnah kiba don ha ki skul ki bym pat da paw. Ngi thmu ba ngin lah ban pynsaphriang ïa kane ka jinghikai sha baroh ki kyndong kynshrot jong ka ri bad ktik ïa ka jingmut jingpyrkhat jong ki khynnah ha kaba ïadei bad ka science bad ba kin long kiba kwah ban wad jingtip, bad kane ka dei ka nongrim jong ka jingsdang ïa ka National STEM Challenge. Khnang ban pynïar ïa ka jingshakri, ngi khmih lynti ban ïoh ïa ka jingïatreilang bad ki corporate ne ki jaka treikam bad ïatehlok bad ki ha ka jingpyntreikam ïa ka CSR ban wanrah ïa ka jingkylla kaba bha bad ba ïaineh ha ka rukom ai jinghikai ha ki skul kiba don ha ki shnong kiba kham sha kyndong..”
Ka STEM Learning ka long kum kawei na ki shlem ai jinghikai kaba nyngkong kaban aiti na ka bynta ban kyntiew ïa ka jinghikai ïa ka STEM ha kylleng ki bynta jong ka ri India. Da ka jingdon jong ka jingtreikam jong ka ha ki 3,800 ki skul ha kylleng ka ri, ka STEM Learning ka la ïatehlok bad palat 250 tylli ki Corporate ban buh ïa ki Science Center, Science Lab, had ki Tinker Lab ha ki skul sorkar kum shi bynta jong ka jingpyntreikam jong ki ïa ka CSR. Da ka jinglah ban kner ïa ka jingtreikam sha palat shi million ngut ki khynnah pule, ka STEM Learning ka la lah ban wanrah ka jingkylla ha ka rukom ai jinghikai da kaba kyntiew bad pynkup bor ïa ki nonglap ïa ki buit bad ki jingstad thymmai ha ka pateng ban wan.
I Drishti Thapa i khynnah skul jong ka Lumparing Vidyapith Secondary School Shillong i ong, “ka jingïaid lynti ha ka jingïashim bynta ha ka jingïakob ïa ka National STEM Challenge ka la long kaba sngewtynnad na ka bynta jong i bad ki paralok jong i. Ka la pyni ïa ki ba kam don kawei ruh ka jingangnud ne ka jingphohsniew kaba heh ne ka bym lah ha kaba ïadei bad ka jingwanrah ïa ki lad ki lynti kiban ïarap ban weng ïa ki jingeh ba ka pyrthei ka ïakynduh. Kane ka jingïakob ym tang ba ka pynïar ïa ka jingmut jingpyrkhat hynrei ka la pynkhih ïa ka mynsiem ban don ka jingangnud ban wad ïa ki lad bad ki buit thymmai bad kumjuh ruh ha ka pule puthi. Ryngkat ka sap bad kumjuh ruh ka jingtip bad la ïoh, ngi sngew ngi la long kiba la pynkhreh ban leh eiei bad noh synniang na ka bynta ka pyrthei da ka jingstad Science bad Technology.”
