London, Naitung, 05: Ka Labour Party, ba la lamkhmat da u Keir Starmer, ka la jop kput ha ka general election da kaba ïoh 412 (+211) Seats katba ka Conservative Party jong u Myntri Rangbah u Rishi Sunak ka la hiar sha ka jingjop ba tang 121 (-250) tylli ki Seats ha ka Iingdorbar House of Commons kaba don 650 ngut ki dkhot.
Ka Labour Party ka la jop 35% bad ka Conservatives party ka la jop 24%. Ka Labour party ka la tam da 20 points ïa ka Conservatives ha ka jingïathep vote.
Hadien ka jingjop jong ka Labour, u Syiem Charles III, u la thung ïa u Starmer kum u Myntri Rangbahduh ba thymmai jong ka ri U.K.
Haba kren sha ki paidbah nongshong shnong jong ka ri ha Downing Street hadien ba la pynbna ba un shimti kum u Myntri Rangbahduh ba thymmai jong ka ri, u Starmer u la ong, “ki kam jong ngi ki long kiba kyrkieh bad ngin sdang noh mynta. Hynrei wat aratien, ngin tei thymmai ïa ka ri Bilat,” u la bynrap.
U Keir Starmer uba la don mynta 61 snem ka rta, un long u Myntri Rangbahduh ba thymmai jong ka ri Bilat kaba long kawei na ki khyndiat tylli ki ri ha ka pyrthei kaba dang pynneh ïa ka jingsynshar Syiem.
Ha Yorkshire, u Sunak, u la jop ïa ka jingïakhun na Richmond seat, bad shim jingkitkhlieh ruh halor ka jingshah rem ka party. Ki nongpeit pyrman ki ong ruh ba ka sainpyrthei jong u Sunak ka don mynta ha ka jingartatien namarba katkum ki dak ki shin ki pynpaw ba u lah ban shah rem wat ha ka Seat lajong ruh.
U Sunak u la ai khublei ïa la ki jong ki nongkyrshan bad ong ruh ba un sa iehnoh ïa ka jinglong nongïalam ha ka Party.
U Sunak, 44 snem ka rta, u la long u Myntri Rangbahduh uba khynnah tam jong ka ri Bilat bad uba nynkong eh napdeng ki bym dei ki dohlieh. U la shimti ïa ka kam Myntri Rangbah jong ka Bilat ha u bnai Risaw, 2022 hadien ka jinghiar shuki jong ka Myntri Rangbahduh barim ka Liz Trust.
