Shillong, Nailur 12: U MLA ka NPP uba la jop la lai sien kynthih na Raksamgre u Limison D Sangma ha ka sngi Thohdieng u la shah jied khlem don ba pyrshah ïa ka shuki Symbud Lamphang ka Ïingdorbar thaw aiñ ka jylla.
Haba pynbna ïa kane na ka shuki u Lamphang u Thomas A Sangma u la ong, “Naba la don tang kawei ka kot thep kyrteng ba la ïohpdiang la shem ba ka la biang kumta nga pynbna ba u Limison D Sangma u la shah jied kum u Symbud Lamphang ka Meghalaya Legislative Assembly.”
La synran ïa u Limison da u Myntri Rangbah u Conrad K Sangma bad u nongïalam ka liang pyrshah u Mukul Sangma sha ka shuki ban trei ïa ka kam ba thymmai.
U Lamphang u pdiang sngewbha ïa u Limison D Sangma sha kane ka shuki kaba heh bad pynpaw ruh ka jingkmen halor ka jingshah jied jong u.
“Nga pdiang sngewbha ïa u bad da kaba ïadonlang ngin pynneh ïa ka kyrdan, ka jingïaid beit bad ka jinglong kyrpang ka Assembly, ban pynthikna ba kan bteng ban ïeng kum ka temple ba shisha ka synshar paidbah jong ki nongshong shnong ka Meghalaya,” u la ong.
“Ka kam jong u deputy speaker kam dei tang ban kyrshan ïa u speaker ha ki jingpynïaid ïa ka ïingdorbar hynrei ban long uba ïeng pdeng, uba don ka kyrdan bad ki jingtreikam ka riti synshar paidbah,” u la bynrap.
Na ka liang u Limison Sangma u la pynpaw ka jingai khublei bad ka jingsngewrit hadien ba u la shah jied khlem don kiba pyrshah sha ka shuki kum u deputy speaker.
“Nga la tip ba ka jingïalam ba shisha kam dei tang ban don ha ka bor, hynrei shaphang ka jingshakri ïa ki paidbah da kaba sngewrit bad ka jinglong hok,” u la ong da kaba ai khublei ïa ki paidbah ka Raksamgre, ka party, bad ïa u Myntri Rangbah.
U deputy speaker ba thymmai u la kular ïa baroh ki dkhot na ka liang pyrshah bad kiba don ha ka sorkar ba un ai ka lad kaba ïaryngkat ban sngap ïa ki kyntien ba sngewkhia jong ki.
U Limison u la banjur ïa ka jingdonkam ban mihkhmat na ka bynta ki sur bapher bapher jong ki jaitbynriew Khasi, Jaiñtia, bad Garo.
Kham hashwa haba kren ha ka prokram pynkup burom u Myntri Rangbah Conrad K Sangma u la ai khublei ïa u Deputy Speaker ba thymmai, bad pynpaw ka jingshaniah ïa ka jinglah jong u ban ïalam bha ïa ka Assembly.
U Myntri Rangbah u la ïaroh ïa ka jinglong sngewrit u Deputy Speaker bad ong ba kine ki jinglong ki long kiba kongsan.
Na ka liang u nongïalam ka liang pyrshah u Mukul Sangma u la ai khublei ïa u Deputy Speaker bathymmai, bad pynpaw ka jingkmen kaba khraw halor ka jingshah jied jong u khlem don kiba pyrshah.
U Mukul Sangma u la pynpaw ka jingshaniah ha u ban pynneh ïa ka burom jong ka Assembly bad ki rukom pynïaid jong ka.
Katba u deputy speaker barim u Timothy D Shira u la ai khublei ïa u deputy speaker bad pynpaw ka jingai khublei ïa ka Assembly ïa ka jingïoh lad jong u ban shakri ïa kane ka kam.
U la ai jingmut ïa u deputy speaker ban pynneh ïa ka jinglong bym shah liang bad kajuh ka lad ïa baroh ki dkhot.
U Shira u la panmab sha ki dkhot ïoh u la pynmong ha ka por ba u dang long kum u Deputy Speaker.
