Shillong, Naitung, 11: U nongïalam jong ka Awaken India Movement (AIM), Meghalaya Chapter Bah Bahshai Marbaniang u la ujor da ka Public Interest Litigation (PIL) ha iingbishar Meghalaya High Court halor ka jinglong jingman bad jingpyntreikam ïa ki 259 tylli ki bos Shillong Public Transport Service (STPS) ha u snem 2011-2012 lyngba ka Jawaharlal Nehru National Urban Renewal Mission (JNNURM).
Ha ka PIL u Bah Marbaniang u la pan jingïarap kyrkieh lyngba ka Iingbishar ba kan tuklar halor ka skhim JNNURM kaba kynthup ïa ka jingjah suki pa suki bad ka jingbym pyndonkam hok ïa ki Bos Rong Saw ïa kiba la thied lyngba ka pisa Sorkar.
“Kum uwei na ki nongshong shnong haba pyrshang ban peit manla ka por khlem da lah ban batai ba ki la jah noh na ka jingshakri paidbah ne ki dang sah kumjuh kum ki Bus ba la jot kiba la iehnoh bad bym treikam shuh ha kylleng ki jaka jong ka nongbah Shillong,” ong u Bah Marbaniang ha u kyrwoh.
“Ka PIL ka kdew ïa ka jingsngewkhia halor ka jingpyndonkam ïa ka mangtyngka kaba la pynlut haduh kumba T. 68.17 klur ba la mang na ka bynta ban thied ïa ki 259 tylli ki bos ha kaba sakhi ba la kham duna bha kiba dang treikam mynta tang kumba 14 snem ba ki dang ïaid,” u la ong.
Haba pynpaw ba u suba ba ka don ka jingpynïaid bad ka jingpyndonkam bakla ïa ki mar ki mata bad ka pisa paidbah, u Bah Marbaniang u la ong, “ka jingbym don ka jingkhuid jingsuba na ka Sorkar Jylla bad ka Meghalaya Urban Development Authority (MUDA), bad ka jinglah ban pyndonkam bakla ïa ki marpoh khyndew jong ka sorkar.”
U la ong ruh ba ha ka PIL, u Bah Marbaniang u la kdew ïa ka jingjah bad jingbym pyndonkam shuh ïa ki Bos saw da kaba buh lyngkrang khlem da shimkhia lyngba ka Sorkar da kaba bret pathar kat shaba poi ki jaka kumba la ïohi .
“Ka PIL ka kynnoh ba bun ki bos rong saw ba kyrpang jong ka STPS, kiba la
pynrung hapoh ka jingshakri jong ka JNNURM da kaba pyntyllun lyngba ka STPS naduh u snem 2011, la ithuh ba bun ki la jot, don kiba la jah noh ki engine, khlem ïohi shuh ki taïar, la pait la pra ki ïit kali bad shibun ki bynta kiba ïadei bad ka kali. Kane baroh ka paw shai ba la shu iehnoh khlem pyndonkam ha ki jaka bapher bapher jong ka nongbah Shillong ne lada dei ha baroh kawei ka Jylla,” u la ong.
“Katkum ka jubab RTI ba la ïoh na ka tnad Pynroi Sor jong ka sorkar jylla, la mang T. 68.17 klur na ka bynta ban thied ïa ki 259 tylli ki bos, hynrei tang shi bynta ki dang treikam. Ka PIL ka buh jingkylli ïa ka jingpyndonkam ïa kine ki pisa bad ka jingbym shai ha ka jingpyndonkam ïa ki. Ka jingsuba bamsap halor ka dorkhas ka kynnoh ïa ka Sorkar Jylla, ki Myntri kiba donkti, bad ka MUDA ba ki pyndonkam bakla ïa ki mar ki mata bad ka pisa paidbah, bad kim lah ban pynneh ïa ka jingkhuid bad ka jingkitkhlieh ha ka jingpynïaid ïa ka STPS,” u la bynrap shuh shuh.
“Ka PIL ka kdew ba baroh ki kali rong saw STPS ki pyndonkam ïa ki number plate kiba don ka rong lieh bad ki nombar kiba iong, kane ka dei ka rukom ba la buh kyrpang na ka bynta ki kali shimet (Private Car) bad kaba la pynkheiñ ïa ki aiñ jong ki kali kamai jong ka ri India kiba donkam ïa ki nombar plate kiba stem na ka bynta ki kali kamai. Hapoh ka khajna bad ki jingkheiñ sorkar, kam don kano kano ka jingpynpaw paidbah ha kaba ïadei bad ka jingkheiñ jong ka Sorkar ha kaba la thep ïa ka khajna ba la lum paidbah kum ki nongshong kali (Passengers) STPS, kaba la pynmih ïa ka jingsngewkhia halor ka jinglong khuid bad ka jingkheiñ jingdiah kaba biang. Ka PIL ka pan jingshai halor ki jingïateh hapdeng ka MUDA bad ki nongpynïaid ne ki seng shimet, da kaba pynksan ïa ka jingdonkam ban don ki kot ki sla bad ka jingbud ryntih ïa ki kyndon jong ka jylla. Ka PIL ka kdew ban bishar bniah man ka por bad ban ïoh paidbah ïa ki kyndon kiba pynïaid ïa ki jingtreikam jong ka STPS. Ka dawa ïa ka jinglong kaba shai ha ka jingpynrung kam, ka jingpynpaw ïa ki jingkheiñ jingdiah jong ki kam, bad ki sakhi ïa ki jingmyntoi ha ka ïoh ka kot bad ka imlang sahlang kiba mih na ka skhim STPS,” la ong u nongïalam ka AIM.
