Shillong, Lber, 04: Ka Federation of Khasi Jaiñtia and Garo People (FKJGP) Greater Nongkhnum Circle, ha ka sngi Baar ka la leit ban iakynduh ia u Executive Engineer jong ka tnad PWD (Road) Nongstoiñ bad ai ruh da ka jingthoh ban dawa ba dei ban shimkhia kyrkieh ban pynbha ia ki surok ba la jot rathai bad ban pynioh surok ha ki bynta jong ka thaiñ Nongkhnum.
Ka FKJGP ka la pynpaw ruh halor ka jingsniew jong ka surok kaba 8 kilomitar kaba pyniasoh ia ka Nongkhlaw sha Byrki. Kane ka surok kaba la palat 40 snem bad ka long kaba kongsan bha ban pyniasoh ia ki shnong kiba bun, kynthup ia kiba don ha Warsan Lyngdoh, South West Khasi Hills District, ka la shah iehnoh beiñ haduh katta katta.
Ka seng ka la pynpaw ïa ka jingsngewkhia halor ka jingsniew jong ka surok PMGSY na Sangriang sha Diengsyiang. Ia kane ka surok la pyndonkam bha da ki nongshong shnong bad ki nongjngohkai pyrthei kiba wan jngoh ia ka dewlynnong Nongkhnum ha kaba ka jingsniew jong kane ka surok ka la pynsniew dur ia ka nam jong ka jylla bad ka West Khasi Hills District.
