Shillong, Lber, 31: U MLA jong ka Mawphlang Constituency Bah Mathew Beyond Kurbah ha ka 31 tarik Lber, 2025 u la aiti ia ki lai tylli ki ing kiba u la pynshna da kaba synniang na ka tulop MLA sha ki lai tylli ki longiing ki baduk. Kine lai tylli ki longiing ki long ka iing jong u Bah Darshan Mawlong bad ka Kong Aidalin Kurbah kiba shong basah ha ka shnong Marbisu Pdengshnong, ka iing jong ka Babysha Synrem kaba sah ha ka shnong Mawngap Mawkharshiiing kaba don san ngut ki khun bad kaba la khladnoh u kurim bad sa kawei pat ka longing ka dei iing ka Kong Ladiangti Marbaniang kaba shong ha ka shnong Umkaber kaba hap Lyniong Lyngdohship.
Ka jingpynshna ia kine ki iing na ka bynta ki longiing kiba duk ka long kum ka jingbat ia ka kular kaba u la khlei ha ka por elekshon bad haduh mynta une u nongmihkhmat jong ka Mawphlang Constiteuncy u la lah ban pynshna da ki phew tylli ki iing hapoh ka Constituency na ka bynta ki longing kup shilliang sem shilliang kiba shong ha ki iing trep.
Ha kane ka sngi, kine ki lai tylli ki longiing ki la pynpaw ka jingsngewnguh bad ka jingkmen kaba khraw ia u MLA uba la pynshna ia ka iing na ka bynta jong ki da kaba kdup ieid bad jaw ruh ia ki ummat jingkmen.
Haba kren ha kane ka sngi, u Bah Mathew u la ong ba un dang iai bteng ban pynshna iing ia ki kup shiliang ki sem shiliang kiba sah ha ki shnong bapher bapher jong ka Mawphlang Constituency.
