Shillong, Jymmang, 25: U Nongïalam ka Liang Pyrshah u Dr. Mukul Sangma u la ong ba ka rai jong ka Sorkar ha kaba ïadei bad ka jingkynnoh ba don ka jingïadei hapdeng ki seng saiñpyrthei bad ki kynhun lehnoh kam dei ban long da ka rai na ka jingsngew saiñpyrthei hynrei dei ban rai katkum ka aiñ jong ka ri.
U la kynthoh ïa kane halor ka jingkylli ka rai jong ka Sorkar ban kyntait ïa ka jingdawa jong ka Congress bad ka VPP ban tohkit halor ka jingkynnoh jong ka seng kieng atiar HNLC pyrshah ïa u Symbud Myntri Rangbah ka jylla u Bah Sniawbhalang Dhar ba u ju bei pisa sha ka kynhun mynba u dang long u Myntri hapoh ka Sorkar ba la ïalam da ka Congress.
“…kano kano kaba ïadei bad ka aiñ ki bor synshar ki dei ban shimkhia ïa ka jingpynpaw da uno uno bad nangta ka jingbthah baroh kawei jong ka aiñ ka dei ban ieng, kam dei ban long tang ka rai saiñpyrthei, ka dei ban long ka rai katkum ka aiñ jong ka ri,” la ong u Dr. Mukul ha ka jingïakren bad ki lad pathai khubor.
Da kaba pynpaw ba teng teng ka jingleh bym ïohi ka ai jingkmen, u la ong, “kano kano ka seng ba la shah kheiñ be-aiñ ha ka MHA lane kano kano ka kynhun ba la kheiñ be-aiñ da ka Sorkar India, ym don mano mano ba lah ban don kano kano ka jingïadei, ne ïashim bynta wat ha ka jingïakren, la ka long ïa uba don ha ka Sorkar ne wat u Myntri Rangbah uba don ha ka bor. Ha Meghalaya, ngi don ïa ka tnad Kam Pohiing, ngi don ïa ka Political Department, hynrei kaei ka jingkitkhlieh jong ka Political Department?”
U la kdew ba kum kine kiei kiei watla ki long kiba kham kyllaiñ ha ka liang ka aiñ hynrei baroh ki shah kynthup ha ka aiñ. “Namarkata ai ba kin (Sokar) pule ïa ka jingbthah jong ka aiñ bad kin leh ruh katkum ka aiñ.”
U Myntri Rangbah barim u la ban jur ruh ïa ka jingshisha ba kano kano ka jingtip, la ka long kaba mynta ne kaba mynshuwa ka don beit ka jingïadei bad kiba bun ki aiñ.
“…ym tang da ka Prevention of Terrorist, ka aiñ UALA, ki don sa kiwei pat ki aiñ bapher bapher kiba don jingïadei, phi don ruh ïa ka aiñ kaba ki khot ka PMLA (Prevention of Money Laundering Act, 2002). Mynta ka PMLA ka tyllun sawdong ban peit ïa ki kam runar,” u la ong.
Katkum ka jingong jong u, ka Sorkar ka dei ban shimkhia ïa kine ki kyndon jong ka aiñ khnang ban weng ïa ki jingartatien.
Shuh shuh, u Dr. Mukul u la ong ba u briew, uba la shah kynnoh ba u don jingïadei bad ki dkhot jong ka seng kieng atiar ba la shah kheiñ be-aiñ un hap ban ïada ïalade bad u don ka hok ban ïada ïalade bad ban pynshai ïa ka nongrim ba u ieng la ka dei tang ka jingshah kynnoh bym don nongrim lane ka dei ka jingleh thok.
