Shillong, Risaw, 27: Ka jingkit palat pud jong ki trok kit coke kiba ïaid lyngba ka surok Ranikor, Phodkroh, Umpung, Balat, shaduh Mawsynram ka la wanrah ïa ka jingthud kaba khah khah ha ka leit ka wan jong ki kali ki riewpaidbah namar ka jingsah kut ki trok kali, ka jingkdiang ki jingkieng dieng, ka jingkylla lyndang ki trok hapdeng surok.
Ha kaba ïadei bad kane ka Khasi Students Union, Ranikor Circle ha u kyrwoh ba la phah sha ki lad pathai khubor ka la pynpaw ïa ka jingsngewkhia halor kine ki jingjia.
Ha u kyrwoh ba la phah sha ki lad pathai khubor ryngkat bad ki video, ka seng ka la kyntu ïa ka Sorkar Jylla ne ïa ki bor synshar District ba kin shimkhia mardor ha kaba ïadei bad kane ka mat hynrei lym kumta ka seng ka la maham ba kam banse ban mih sha surok ryngkat bad ki paitbah.
Ka Seng ka la dawa ruh ïa ki bor synshar district ban pynjari da ka kyndon kaba mana ïa ki trok kit coke ba kim dei ban kit palat ïa ka 9 ton namarba ka surok naduh mawsynram shaduh Ranikor ka dei ka surok kaba rit bad kaba la pynïasoh da ki jingkieng dieng.
