Shillong, Nailar 05: U Bah Copperfield Lyngdoh Kynshi u la ujor sha ki Pulit ban pyntip ba ha ka step 2 tarik mynta u bnai ki runar bym lah ban ithuh ki la tuh ïa ka thuk thuk jong u kaba don u nombar ML-05AB-9020 na phyllaw ka ïingsah jong u ha Mawlai Mawdatbaki Umparmaw, Shillong.
Ka samla A Mawthoh ka la ujor ban pyntip ba hapdeng ka miet 1 tarik bad 2 tarik mynta u bnai, ki runar bym lah ban ithuh ki la tuh ïa ka Scooty kaba don u nombar ML-05X-8033 na Umkdait Nongmensong, Shillong.
Ki Pulit ki la pyntip ba ha ka 3 tarik mynta u bnai ki la ïoh bat ïa u Charlie Pyngrope bad ha ka jingtohkit u la phla ba u la tuh ïa ka Bicycle na Umpling Lumdiengmet bad u la die ha Demseiñïong, Shillong. Kham hadien, ïa kane ka Bicycle la lap na kawei ka longkmie ka Kong T. Malngiang bad la aiti sha u trai jong ka Bicycle.
Ha kawei pat ka jingjia u Prashant Soni u la ujor ban pyntip ha ka 3 tarik mynta u bnai ba ki la don ki runar bym lah ban ithuh ki la tuh ïa ka thuk thuk kaba don u nombar DL-11H-2358 najan ISBT Mawiong, Shillong By-Pass.
U Bah Shanskhemlang Syiemlieh u la ujor ba ha ka miet jong ka 2 tarik mynta u bnai ki runar bym lah ban ithuh ki la tuh ïa ka scooty jong u kaba don u nombar ML-05AD-0439 na Umpling, Shillong.
Ki Pulit ki la pyntip ba u Kenton Ch Marak u la ujor ba ha ka 30 tarik, Naitung ha ka por 11:00 baje mynmiet, ka thuk thuk jong u kaba don u nombar ML-08F-2415 ka la jah na ka phyllaw ïingsah jong u ha Nawalgre, Tura (WGH).
Ki Pulit ki la pyntip ba ki la ïoh jingtip ba ha ka miet 1 tarik mynta u bnai ki sengbhalang ka Garobadha area (WGH) ki la ïoh bat ïa kawei ka kali Bolero pick-up, kaba la kynnoh ba ka la kit ïa ki dieng jri bad ïa kane ka kali la aiti noh sha ki Pulit.