Shillong, Jymmang, 30: Ka jingther jong u slap ar sngi kynthih ka la wanrah ïa ka jingtwa khyndew kaba jur bha hajan ka jingkieng Umtyngngar bad ki kali kiba thmu ban hiar sha Sohra bad leit sha Pynursla bad kiba wan na kine ki thaiñ kiba thmu ban wan kiew sha nongbah Shillong ki la sahkut lut ha shiteng lynti.
Ki bor ba dei peit tang shu ïoh jingtip halor kane ki la pyrshang ban pynkhuid ïa ka khyndew bad ïa ki maw kiba hap hapdeng surok.
Ka NHIDCL kaba pyntrei ïa ka surok Shillong-Dawki ka la pyntip ba yn hap ban khang shipor ïa ka surok namarba yn hap ban shu siat pynbthei ïa ki maw kiba heh.
La pyntip ba katto katne kynta yn khang shuwa ïa ka surok ban hiar sha ki thaiñ Sohra tad haduh ban dadep pynkhuid.
Ka jingtwa khyndew ka la jia ruh ha ka thaiñ Rynjah ha ki bynta jong ka surokbah Laitlyngkot-Lyngkyrdem.
Dang shen ka Sub Divisional Officer jong ka Pynursla Civil Sub division ka la pynmih da ka jingpynbna paidbah ba naduh ka 26 tarik haduh ka 30 tarik mynta u bnai yn khang haduh hynriew kynta manla ka sngi ïa ka surok Laitlyngkot –Lyngkyrdem bad kane kan long ha baroh san sngi namarba ka don ka jingshna surok ha ki bynta kiba kham don jingma.
Ka jingpynbna ïa ka por khang kali ka long naduh ka por 8:00 baje mynstep haduh ka por 11:00 baje mynstep bad mynsngi pat kan long naduh ka por 1:00 baje noh sngi haduh ka por 4 baje janmiet kaba mut 6 kynta ha ka shisngi.
Ha Mawlai, ka la don ka jingshlei um ka surokbah ha ka jaka kaba don markhap hapdeng ka Mawlai Nonglum bad ka Mawlai Nongpdeng.
Ki kali kumjuh ruh ki thuk thuk ar shaka ki la hap ban phai kylla noh namarba kim shlan shuh ban ïaid.
Ha Polo, ka Buddha Vidyalaya Niketan Secondary School kaba don ha Forest Colony ka la shlei da ka um kaba la rung shaduh ki kamra Class.
Ki bor pynïaid skul ki la pyllait noh ïa ki khynnah ban leit phai sha la iing.
Kane ka jingshlei um ka la jia naduh ka por mynstep bad ha ka por 11:00 baje eiei la pyllait noh ïa ki khynnah skul.
U nonghikai jong ka skul u la ïathuh ba kane kam dei shuh ka jingjia banyngkong hynrei ka dei kaba la ju jia mana ka por tang shu ther u lapbah bad ka daw ka dei namar ka jingsahkut ki jaboh jabaiñ ha ki nala.
 | ReplyForwardAdd reaction |
