Shillong, Jymmang 22: Ka ophis Sub Divisional Pynursla Sub Division ka pyntip kyllum ïa baroh ki nongleit nongwan bad ïa ki paidbah ba ïa ka shilynter jong ka surok hapdeng ka Laitlyngkot – Lyngkyrdem (Chainage Kms 24+00- 37+00) yn sa khang shuwa shipor ïa baroh ki kali ba leit ba wan naduh ka 26 tarik mynta u bnai haduh ka 30 tarik mynta u bnai naduh ka por 7 baje mynstep haduh ka por 10 baje mynstep bad 12:30 nohphai sngi haduh ka por 4 baje janmied.
La ong ba kane ka jingkhang shipor ka long kaba donkam na ka bynta pynthikna ïa ka jingïaid beit ïaid ryntih jong ka jingshna ïa ka surok bad khamtam eh na ka daw jong ka jingdon ki bynta ba syier ha lynter ka surok kiba donkam ban pynkhuid bad pynbha.
La kyntu jur ruh ïa ki nongleit nongwan ba kin kiar na ka jingleit jingwan jong ki ha ka por mynmied ha kine ki bynta jong ka surok kum ka jingshim jingïada lypa na ka daw jong ka jingap jingma bad na ka daw ka jinglong ka surok bad ka suiñbneng.
La kyrpad ruh ïa ki nongleit nongwan ban ai ka jingïatreilang bad ban khreh biang por lypa ïa la ka jingleit jingwan jong ki ha kitei ki sngi bad ki por ba la buh bad kumjuh ruh ba kin bud ryntih ïa katei ka jingkyntu ban kiar ïa ka jingïaid jingïeng ha ka por miet na ka bynta ka jingmyntoi lang jong uba bun bad ka jingpyndep biang por ïa ka jingshna ïa ka surok.
