Shillong, Risaw 23: Ka Meghalaya Pensioner’s Association (MPA) ha ka sngi Palei jong ka taïew ba la dep ka la pynlong ïa ka jingpynsngewthuh paidbah halor ka shongkha khynnah bad ka jingeh kaba mih na kane.
Ki nongai jingkren ha kane ka jingïalang pynshai bad pynsngewthuh kaba la long ha Balawan College, Umsning, Ribhoi District ki long u Dr. Sandor RL Nongbri bad ka Kong Naphibanmer Laso.
Kine ki arngut ki nongkren ki la ong ba katkum ka jingtih bniah la lap ba ka jingshong kha khynnah ka jur bha ha ki jaka sor bad kumjuh ruh wat ha ki nongkyndong.
Ki la ai jingmut ïa ki kmie ki kpa ba kin long barabor kiba ïajan bad la ki jong ki khun ki kti bad ban ïasyllok bad ki khun manla ka sngi ha kaba ïadei bad ka kam shongkha shongman khlem kano kano ka jinglehraiñ khnang ba ki khun ki kti kin ym shah ïalam bakla ha ka ïaid ka ïeng ha la ki jong ki paralok. Ki kmie ki kpa ki dei ban peit thuh bha ïa ka ïaid ka ïeng jong ki khun ki kti bad ban ïasyllok lang bad ki manla ka por.
Ki kmie ki kpa ki dei ban buh jingduwai ïa ki khun manla ka sngi ba ki khun kin ym jam sha u pud u bym dei ha ka rta kaba dang rit.
Ban ïarap ïa ki khun samla ban ïoh ïa ki jinghikai kiba thikna ha ki skul bad ki kolej bad ban pynbeit ïa ki jingïathir nia ha ki skul bad ki kolej na ka por sha ka por khnang ba ki khun samla kin dup sngewthuh ban lait na kine ki jingshah riam ha ka shrip jong ka shongkha dang ha ka rta kaba khynnah bad ban lait ruh na ka jingpynkheiñ ïa ki aiñ shongkha shongman.
Ha kane ka sngi, la ïashim bynta lang da ki samla pule shynrang bad kynthei, ki rangbah bad ki longkmie bad kynthup ruh ki dkhot jong ka Meghalaya Pensioner’s Association.
