Shillong, Naitung, 24: Ka Committee on Public Undertakings jong ka Iingdorbar Thawaiñ ka jylla ha ka sngi Palei ka la hiar jurip ïa kiba bun ki karkhana ba la bei pisa da ka Meghalaya Industrial Development Corporation Ltd. (MIDC Ltd.) ha Byrnihat Industrial Area, Ri-Bhoi District.
Ïa ka jingjurip la lamkhmat da u Chairman jong ka Committee u Brening A Sangma ryngkat ka jingsynran lang jong ki MLA ba kynthup ïa u Marthon Sangma, u Bah Heavingstone Kharpran, u Dr. Celestine Lyngdoh, Bah Banteidor Lyngdoh bad u Bah Pius Marweiñ.
Ka jingthmu ba kongsan ha kane ka jingleit jurip ka long ban bishar bniah ïa ka jingsiew ram da ki karkhana kiba la ïoh jingïarap pisa na ka MIDC Ltd. Ka Committee ka la bishar bniah ïa ka jingïaid shaphrang jong baroh ar bynta, kata ki bym paw siew dep ïa ka ram bad kiba la sdang ban siew ïa ka ram bad la pynshlur ïa ki ban pynthikna ba ki dei ban siew dep manla ka por ïa ka ram haduh ban da dep pura.
Ka Committee ka la ong ba ka M/s CMJ Breweries Pvt. Ltd., Ri-Bhoi District, la lap ba ka long kaba ïaid beit ïaid ryntih bad katkum ka por ba la buh bad ki jingkitkhlieh jong ka ban siew ïa ka ram ba la shim.
Ka M/s Greystone Strips Pvt. Ltd., Ri-Bhoi District, ka M/s Greystone Smetters Pvt. Ltd., Ri-Bhoi District ka bym shym la siew mynshwa, ka la siew noh shi bynta. Hynrei u Managing Director jong ka kompeni un hap ban ai jingpynshai shuh shuh, namar ba ki jingsiew ki dang sah khlem pat lah ban pyndep bad kim pat biang satia.
Ka M/s Byrnihat Hotel Cum Shopping Complex, Byrnihat Proper, Ri-Bhoi District, kam shym la lah satia ban pyndep ïa ka projek jong ka namar ka jingbym biang ka bording. Kane ka la pynthut bha ïa ka jingkiew bad ka jingtreikam jong ka Complex, kaba ktah ruh ïa ka jinglah jong ka ban pynmih khajna bad ban siew ïa ka ram.
Ka Committee ka la kular ban kan sa rah ïa kane ka mat bad ka tnat ba dei peit khnang ban dup wad ïa ki lad ki lynti ban pynïoh ïa ka bording.
Ka Committee ka la banjur ïa ka jingdonkam ban siew dep ïa ka ram ha ka por kaba biang ban ïada ïa ka jinglong jingman ha ka liang ka pisa bad ka jingtreikam jong ka MIDC Ltd. Ka la pynskhem ïa ka jingkular jong ka ban buddien bad khmih bniah manla ka por na ka bynta ban pynthikna ïa ka jingpyndonkam hok ïa ka pisa paidbah bad ban kyrshan ïa ka jingroi ki karkhana baroh kawei ka jylla.
