Shillong, Rymphang 20: Ka Iingbishar Meghalaya High Court ha ka sngi Palei ka la bthah ïa ka Trial Court ban ïaid shakhmat ha kaba ïadei bad ka jingshim jubab na ki nongai sakhi ha ka bamsap thungkam nonghikai ha u snem 2009 ba la sei madan da ka Central Bureau of Investigation (CBI).
Ka hukum ba la pynmih da ka Bench kaba khlieh da u Chief Justice IP Mukerji hadien ba la shong bishar ïa ka Criminal Case kaba lai ngut ki nongshah mudui kynthup ruh ïa ka Myntri ha ka Sorkar MDA, ka Dr. Ampareen Lyngdoh.
Ka Dr. Ampareen, kaba long mynta ka Myntri ka Koit ka Khiah, bad kiwei kiwei ki ophisar ki la shah mudui halor ka jingkynnoh donkti leh be-aiñ ïa ka rukom jied bad thungkam ïa ki Assistant Teacher ha ki Lower Primary School ba la pynïaid da ka Sorkar Meghalaya ha u snem 2008-09.
Ka jingtohkit ïa ka case (PS Case No.62(07)2011, hapoh ki Section 120B, 167, 466, 408, 34 Indian Penal Code) la bynshet ha ka Central Bureau of Investigation (CBI) ban pynlong ïa ka jingtohkit da ka Iingbishar High Court.
Ha ka hukum jong ka, ka Iingbishar ka la ong ba ki dorkhas ba la ujor da ki nongshah mudui ki long halor ki nongrim bapher bapher. Ka nongrim ba la pynpaw da ka nongshah mudui ba nyngkong kaba long ka Myntri Sorkar ha kane ka Jylla ka long ba ha ka jingpynngat kyndon (Charge-sheet) kam shym la pynpaw ïa kano kano ka kam leh bymdei.
“Da ka hukum kaba nga la pynmih ha ka 9 tarik Nophrah, 2024, nga la pynpaw ïa ka jingkwah jong ka Iingbishar ban pynbeit kloi ïa ka mukotduma. Kane ka Iingbishar ka la ïohi ba ka jingbishar ka don ïa ka thup kyrteng kaba jrong haduh 162 ngut ki nongsakhi bad lada pynlyngkot noh ïa ka thup kan pynkut noh kham kloi ïa ka jingbishar bahok. Nalor kiwei pat kiei kiei ka lah ban pynsuk ban pynkut kloi ïa ka jingbishar,” ong u Chief Justice ha ka hukum.
La ieh ha ka CBI ban shim ïa ka rai halor kane ka mat bad ha ka Criminal Court ban dang eksamin shuh shuh ïa ki nongsakhi tad haduh ban da ka ai rai da ka CBI. Ka paw kumba kane ka rai ka dang sah pongding.
Ïa mynta, kumba 21 ngut ki nongsakhi ladep ban eksamin.
U nongïasaid na ka bynta kiba shah kynnoh u la aiti ïa ka thup jong ki nongsakhi ba la tyrwa ban eksamin da ka CBI kiba la poi mynta haduh 400 ngut, kaba ha ka jingshisha u Deputy Solicitor General um pat lah ban pynshisha haduh mynta.
“Kam donkam ban ong ba kane ka jingpyntreikam ban tohkit ïa ki sakhi ka shong ha ka jingmih jong ki aplikeshon katkum ka Section 482 jong ka Criminal Procedure Code ba la leh da ki nongshah mudui na ka bynta ban pyndam noh ïa ka jingbishar. La pynpaw ruh ba ka Trial Court ka la buh sngi ha ka 3 tarik, 4 tarik, 5 tarik, 6 tarik bad 7 tarik Lber, 2025, ban tohkit bniah ïa ki nongsakhi na ka bynta ban pynngat kyndon aiñ. Kane ka Iingbishar ka bthah ba ka Trial Court ka lah ban pyntyllun shakmat ïa ka jingeksamin,” ong shuh shuh ka hukum na u Chief Justice.
Shuh shuh u la bthah, “ka CBI ka dei ban pynpaw sha ka Criminal Court hato kan ïaid beit shakhmat ban eksamin ïa baroh ki nongsakhi ne yn pynduna noh ïa ki nongsakhi lane ban pan por shuh shuh lane yn aiti beit tang ïa ka thup kyrteng jong ki nongsakhi lane ka thup kaba lyngkot. Lada ka CBI ka la shim ïa ka rai namarkata ka Trial Court kan hap ban ïaid beit shakhmat. Lada ka dang pan por ban shim rai halor kane kam, ka jingeksamin ïa ki nongsakhi hadien ka jingeksamin ïa ki nongsakhi ba la don lypa ha ka synduk dei ban pynsangeh shwa tad haduh ban da shim rai da ka CBI.”
Ïa mynta, ka Iingbishar ka la rai ban bishar tang ïa ki aplikeshon jong ki nongshah mudui hapoh ka Section 482 CrPC ryngkat bad ka aplikeshon hapoh ka kajuh ka kynduh ba la ai da ka CBI ha ka 11 tarik, Lber.
