Shillong, Ïaïong 13: U Chairman ka Hynñiewtrep Border Dispute Redressal Forum (HBDRF) Chandame Sungoh u la ong ba ka 13 tarik mynta u bnai kan dei barabor ka sngi ban sah kynmaw kum ka sngi kaba sngewsih na ka bynta ki paidbah Khasi-Pnar jong ka Block I bad II.
Ha ka jingkynthoh jong u, u Bah Sungoh u la ong ba dei ha kane ka sngi bad ha ka snem 1951 ba ka sorkar Assam mynshwa da ka bor ka la kheiñ ba ka Labang Nangphyllut Dollloiship kaba la tip kum ka Block – I bad kaba dei ka bynta jong ka Raid Nangtung Khyrwang kaba la tip ruh kum ka Block-II la pynngat sha ka United Cachar & Mikirs Hills barim bad mynta la tip kum ka Karbi Anglong Autonomous Council of Assam ha ka por ba la pynmih ïa ki District Councils da ka Notification No TAD / R/ 31/ 50/ 149 jong ka.
Ïa kane ka jingpynbna la leh da ki heh jong ka sorkar Assam khlem ka jingtip bad mynjur da ki nongshong shnong jong ka Khasi Pnar, kiba dei ki long trai jong ka jaka bad ka khyndew ka shyiap bad kane ka aiñ ka la ktah shibun ïa ka hok jong ki nongshong shnong kane ka thaiñ.”
U la ong ba ka Forum bad ki paidbah ka thaiñ kin ïaibteng ban pyrshah jur ïa kane ka jingleh bym hok da ka sorkar Assam bad kin ïakhun ban ïohbiang ïa kine ki jaka kumba la buh da ki longshwa manshwa jong ka jylla Meghalaya.
Na ka liang ka Forum ka la pynpaw ïa ka jingkyrmen ba ka jingïakren pynbeit pud hapdeng ka sorkar jylla Meghalaya bad ka Assam kaba la neh lah slem yn sa lah ban pynphai biang ïa ka block I & II sha Meghalaya.
