Shillong, K’lyngkot, 20: Ka Ri-bhoi Peoples Council (RBPC) ha ka Lah Sngi u Blei ka la dawa ïa ka Sorkar Jylla ban pynkynriah kam mardor ia ka Additional Deputy Commissioner jong ka Ribhoi District ka Kong B.L Pakynteiñ.
Ka seng ka la aiti ruh da ka dorkhas sha u Chief Secretary ka Sorkar Jylla u Bah Donald P. Wahlang ban pynsngew ïa ka mat jingdawa.
Ha ka jingïakren bad ki lad pathai khubor u President jong ka RBPC u Bah Jason L. Nongrum u la ong ba ka jingdawa ban pynkynriah kam ïa ka Kong BL Pakynteiñ na Ribhoi ka long hadien ba ka seng ka la ïoh pdïang ïa kiba bun ki jingujor na ki paidbah nongshong shnong ka them Ri-bhoi.
U nongïalam ka RBPC u la kynnoh shuh shuh da kaba ong, “kane ka ophisar MCS ka don ïa ka jingsngew hangamei, ka jingsngew tip lut, ka jingsngew ïapher na kiwei, ban pynlehraiñ bad ban ñiew ïa kiwei ba ki long kham hapoh.”
U la pynpaw ruh ïa ka jingsngewlyngngoh ba wat hadien ba ka Sorkar ka la pynmih ïa ka hukum pynkynriah kam naduh ka 18 tarik, Jylliew, 2024 bad ha ka 10 tarik Nailur, 2024 ba kane ka ophisar MCS ka ladei ban leit shimti kam noh ha East Khasi Hills District kum ka Deputy Secretary ka Sorkar Jylla hynrei haduh mynta ka dang ïai bteng ban don beit ha Ribhoi District.
Dei ha ka jingïakynduh ïa Chief Secretary mynta ka sngi ka seng ka la ïoh jingtip ba ka Sorkar ka la pynsangeh noh ïa ki hukum pynkynriah kam ïa ka Kong Pakynteiñ.
Ha kane kajuh ka sngi, ka seng ka la kyrpad ruh ïa ka Sorkar Jylla ban thung shuh ïa ki Extra Assistant Commissioner bad ban thung ïa u Block Development Officer (BDO) bapura ha Umsning bad ha Umling C&RD Block.
