Shillong, Naitung, 28: Ka samla Ammiel Eleona Warjri na ka Jingïaseng Samla Balang Presbyterian Riatsamthiah ka la long ka lahduh ha ka jingïakob rwai marwei ba la pynlong da ka Shillong Christian Youth Organisation & Conference (SCYO&C) katba ka Jingïaseng Samla Balang Presbyterian Madanrting ka la long ka lahduh ha ka jingïakob rwai kynhun.
Ha kane ka jingïakob rwai kaba la long ha ka sngi Thohdieng jong ka taiew baladep ha U Soso Tham Auditorium Shillong la sakhi lang da u Myntri ka Sorkar Jylla u Bah Paul Lyngdoh uba la long kum u Kongsan, ka Director jong ka Arts & Culture ka Kong I.Majaw kaba la long kum ka Symbud Kongsan, ki Pastor, ki Tymmen Basan, ki nongkitkam jong ka Shillong Christian Youth Organisation & Conference kiba rim bad kiba mynta bad kiwei kiwei.
Haba phai biang sha ki nongjop ha ka jingïakob rwai marwei, ka samla Wanri Bakordor Kharsahnoh na ka Jingïaseng Samla Balang Presbyterian Phudmuri ka la ïoh rah ïa ka kyrdan kaba ar bad u Melberg Shangdiar na ka Jingïaseng Samla Balang Presbyterian Malki u la jop ïa ka kyrdan kaba lai.
Ha ka jingïakob rwai kynhun ka Jingïaseng Samla Balang Presbyterian Phudmuri ka la jop ïa ka kyrdan kaba ar bad ka Jingïaseng Samla Balang Presbyterian Riatsamthiah ka la jop ïa ka kyrdan kaba lai.
Kane ka jingïakob rwai ka long ha ki ar tylli ki kyrdan, kata ha ka Solo bad Group.
Ki nongïashim bynta ha ka Solo ki don 13 ngut na ka Jingïaseng Samla Balang Presbyterian Jaïaw, Laban, Malki, Phudmuri, Mawlai, Mawpat, Madanrting, Riatsamthiah, Lummawbah, Umlyngka, Lumparing, Laitumkhrah & Lawsohtun.
Katba ki nongïashim bynta ha ka Group ki don 12 tylli na ka Jingïaseng Samla Balang Presbyterian Jaïaw, Laban, Malki, Phudmuri, Mawpat, Madanrting, Riatsamthiah, Lummawbah, Umlyngka, Lumparing, Mawiong & Lawsohtun.
