Shillong, K’lyngkot, 27: Ka Hynniewtrep Achik National Movement (HANM) ha ka Lah Sngi u Blei ka la pynsngew sha ka Sorkar Jylla halor ki jingeh ba ki paid Khasi Pnar kiba shong basah ha ki shnong bapher bapher ka Block-I ki ïakynduh mynta la 53 snem naduh ba ka Meghalaya ka la ïoh ïa la ka jong ka jylla na ka daw ka jingbym lah ban leh eiei ka Sorkar Jylla baroh shikatta ki snem.
U Vice President jong ka seng u Samla Bawan Nongsiej ha ka jingïakren bad ki lad pathai khubor hadien ka jingïakynduh ïa u Symbud Myntri Rangbah ka Jylla u Bah Sniawbhalang Dhar uba dei ruh u Chairman jong ka Regional Committee ïa pynbeit pud na ka bynta ka West Jaintia Hills ban pyntip ba ha ka jingleit iuhkjat jong ki nongïalam bad ki dkhot ka Seng ha ka 12 tarik, Naiwieng, 2024 sha ka thain Block-I u la ïathuh ba ki nongïalam shnong jong ki phra tylli ki shnong kiba kynthup ïa ka shnong Moopud, Shnong Thymme, Mowbhar, Mowjem, Mowlaiñ, Madan Nangkylla, Sapiang bad Langet ki la pyntip ba kim ïoh satia ïa u khaw reshon katkum ka National Food Security Act, ka skhim Mahatma Gandhi National Rural Employment Guarantee Schem, ki jaka ai jingsumar, ka surok kaba biang, ka umbam umdih kaba biang bad ka bording ilektrik kiba long ki jingdonkam ba kongsan tam eh jong ki briew.
U la ong ruh ba kine ki nongïalam shnong ki la pynpaw ruh hakhmat ka seng ïa ka jingshah thombor da ki phew snem ha ki lehnoh Karbi bad ka jingshah pyndik ba laiphew jait ha ki Pulit Assam.
Ha ka dorkhas ba ka seng ka la aiti sha u Symbud Myntri Rangbah ka la pyntip ba ki paidbah jong kine ki shnong ki hap ban shim ruh ïa ka Election Photo Identity Card jong ka Jylla Assam hynrei kaba kham pynlyngngoh ka long haba ki aplai ïa ka Election Photo Identity Card na ka jylla Meghalaya ki hap ban register kum ki nongshong shnong jong kiwei pat ki shnong kiba jngai na ka thain Block-I.
