Shillong, Rymphang, 02: Ka shnong Sohbar ka dei ka shnong kaba donnam bad kaba don ia ki khana u menbarim khamtam ha jingpynneh ia ki sawdong sawkun jong ka mei mariang, ki khlaw ki btap bad ki um ki wah.
Ka shnong Sohbar ka donnam ia ka khana jong ki Phareng mynba ki dang synshar ia ka rilum Khasi bad Jaiñtia bad ka khubor kaba sngewtynnad ka long ba ki paidbah nongshong shnong ki pynneh ia riti jingkhuid bad ka kam kaba ki ju im jakpoh ha ki bri ki bsah lyngba ka tamasa kaba ju rakhe manla snem lyngba ka Sohbar Tourism Festival.
Mynta u snem ka shnong Sohbar lyngba ka Sohbar Cultural Tourism Society (SCTS) ka la pynlong ia ka tamasa Lariti ha ki snap iathuh khana ia ka jinglong jingim ki paid nong Sohbar kiba im jakpoh ha ka rep ka riang kum ka jingrep Latyrpad bad pynneh ia ka khlaw ka btap jong ka shnong da ki jingjyrngam.
Ia kane ka tamasa la pynlong ha ki lai sngi, kaba la sdang naduh ka 30 tarik, Kyllalyngkot bad ba la pynkut noh hynnin ka sngi Saitjaiñ hapoh ka jingialam jong u Chairman u Bah K.S Lyngskor uba dei ruh u Sordar ka Sohbar Elaka bad u Secretary u Bah C. Shullai
Ia ka prokram pynneh la ki snap ki shynna ia ka jingkhuid ban pynneh mariang kaba tip kum ka Biodiversity Forest lyngba ki lariti jingim kamai jakpoh ki nong Sohbar la pynlong ha jaka pynneh pynsah khlaw ha Khlieh Umlang Biodiversity Forest, Sohbar East Khasi Hills District.
U Head jong ka Creative Folklore Department ka skulbah NEHU Professor Desmond Kharmawphlang u la kongsan ban plie bad ai ki sakhi bad ki dak thoh kiba u la lum lang ia ki jingdon jingem jong ka shnong bad ki dur ki dar lyngba ka jingwad bniah tih bniah na ka tnad Creative Folklore ka skulbah NEHU.
Ha ka sngi sdang ia ka tamasa lariti khuid mariang katkum ka dustur ki nong Sohbar ba ki leit bri ban kheit latyrpad ban lum ia kaba ki la pyni ia ka skit kaba ki shynrang bad kynthei ba ki trei. U Prof. Desmond u dei uwei na ki tihbniah uba la ju leit man ka por.
Ka tamasa pynneh lariti da ki kam pynjyrngam ia ka shnong Sohbar bad ka jingiakop pynlong prokam ia ki nongshong shnong kiba kynthup ia ka jingiakop dro ia ki dur mariang ki kolshor kiba don ha them Sohbar bad ka jingiakop rwai phawar ha ka Sngi sdang.
U Prof. Desmond haba pasiaw ia ka pasoh ka shnong Sohbar ka dei kawei na ki jingthmu kaba phalang shynna ia ka jingriewspah ki paid Sohbar ka long ka tem ka put ka rwai ka siaw bad ka shad ka kmen iathuh utei u nongwad bniah.
U iathuh shuh shuh ba ka metbah u Hynniewtrep Hynniewskum lyngba ka shnong Sohbar bad ki them ka thaiñ Sohra ka la long kum kawei na ki par ksiar rong jyrngam ba itynnad eh ha pyrthei ka la long kum ka iingsah jong ki sim ki soh ki khniang ki bsiah.
Kane ka dei ka par ksiar ba la ai da u Blei ia ki nongpateng ban ri ban sumar bad ban pyn eh mariang; u briew um lah ban lait ne bthat na ki sawdong sawkun ka mariang bad u khun bynriew um lah ban lait ia ka riti dustur kaba im ba ai kamai jakpoh lyngba ka meiriang ban bam.
Ka Bakai pyrthei ka long kawei ka Lariti dustur ban pynneh ban khot ia kiba shang pyrthei iathuh u Prof. Desmond.
