Shillong, Risaw, 14: Ka Employment Monitoring Cell jong ka Khasi Students Union (KSU) ha ka lah Sngi u Blei ka la pan jingpynshai na u Secretary jong ka tnat Personnel & Administrative Reforms ka Sorkar Jylla u Bah Cyril V. Darlong Diengdoh halor ka Advertisement jong kawei ka post Guitar Instructor ha ka State Institute of Arts & Culture kaba la mang sha ka Garo Category katba ha ka jingshisha ka dei ka bhah kaba dei ban mang sha ka Khasi-Jaiñtia Category.
Ha ka jingïakren bad ki lad pathai khubor u Chairman jong ka Employment Monitoring Cell ka KSU u samla Reuben Najiar u la ïathuh ba kane ka kynrum kynram ka la mih na ka daw ba ka Sorkar ka pyntreikam shadien ïa ka Roster System ym kumba la dawa da ka KSU ban pyntreikam shakhmat.
Kane ka jingpan jingpynshai jong ka KSU na u Secretary jong ka tnat Personnel & Administrative Reforms ka long hadien ba u Director jong ka Arts & Culture, Sorkar Meghalaya u la pynshai ha ki nongïalam ka seng ha ka 9 tarik mynta u bnai ba ka jingbthah ban bhah ïa ka kam sha ka Garo Category ka dei kaba la bthah da ka tnat Personnel & AR bad kum ka Directorate kam donbor eiei halor kane ka bynta.
Ka seng ynda ka la tohkit bha, ka la lap ba dei ka jingpyntreikam ïa ka Roster kaba la pynkulmar namarba na ka liang jong ka tnat Arts and Culture ha kaba ïa ki Garo ba la ïoh kam ha u snem 2007 la pynrung ha Khasi-Jaiñtia Category ha ka Roster kaba long kaei kaei kaba bakla shibun bad mynta ynda la dei sa ka pali ban pynbna biang ïa ka Advertisement, ka la mih ka jingkulmar namarba ka ladei ban ai bhah sa sha ki Garo katba ki Garo ki ladon lypa ha Khasi-Jaiñtia Category kaba paw kumba ka tarajur ka la noh shiliang bad ka bhah ka la leit lut 100% sha ki Garo.
“Ngi la kren shai hakhmat u Secretary ka tnat Personnel & Administrative Reforms ba ïa ki jingbakla baroh ka Sorkar ka hap ban bahkhlieh,” la ong u samla Rueben.
Ha kajuh ka por ka seng ka la pan jingpynshai ruh halor ka post Scientific Officer, Senior Scientific Assistant, Scientific Assistant ha ka Mobile Forensic Crime Scene Unit kaba hap hapoh ka jingkhmih jong ka Directorate of Forensic Science kaba la pynbna paidbah 27 tylli ki post.
“Kum ka seng ngi lap ba ka Directorate of Forensic Science ka la kiar na kaba pyntreikam ïa ka Meghalaya Forensic Science Laboratory Services Rules, 2021 bad katkum ka Advertisement la shah ban aplai tang ïa ki samla pule kiba la pyndep ïa ka Degree ha ka Forensic Science bad ym shym la shah ïa ki samla kiba pyndep ïa ka jingpule ha kano kano ka Science Stream ba ki lah ban aplai,” la pan jingpynshai ka KSU na u Secretary ka tnat Personnel & Administrative Reforms.
“Ka seng ka ladep pan jingpynshai na ka Director jong ka Directorate of Forensic Science hynrei kam shym la don kano kano ka jingpynshai halor kane bad ka seng ka maham ba ka jingthungkam ka dei ban long katkum ka Rules bad ym dei satia ban pynduh pyndam da kino kino ki ophisar sokrar ne da ki nongtrei jong ka Directorate tang ban pynmyntoi ïa ki nongaplaikam lajong,” la ong ka seng ha ka dorkhas.
U samla Najiar u la ïathuh ba u Secretary ka Personnel & Administrative Reforms un sa khot ïakren ïa ka Director jong ka Directorate of Forensic Science ban ïakren halor kane.
