Shillong, Jylliew, 24: U Nongaiktien jong ka BJP Bah M. Kharkrang ha ka sngi Baar u la ong ba ka Party kam ïa don bynta eiei bad ka jingtyrwa ba dang shen ban jer ha ka kyrteng ‘Raja Memorial Viewpoint’ ha Sohra.
Ïa ka jingtyrwa la phah da u James Syiemiong, uba kam ba u dei u dkhot ba la slem jong ka BJP, lyngba ka shithi sha u Myntri Rangbah ka Jylla Conrad K Sangma ha ka lah sngi U Blei.
U Bah Kharkrang u la ong ba ka jingtyrwa jong u Bah Syiemiong ka dei ka jingdawa shimet bad kam don jingïadei eiei bad kano kano ka kam jong ka party. “Ïa ka jingai nam ïa ka Viewpoint ym shym la ïakren eiei satia hapoh ka party ha kano kano ka liang, ne ha kano kano ka por,” u la bynrap. Ka jingpyndonkam ïa ka shab jong ka BJP ha ka shithi ba la phah da u Bah Syiemiong kam mut satia ba ka dei ka shithi jong ka party,” u la ong.
Ka BJP Meghalaya ka la pynkynmaw ruh ïa ki paidbah ba ïa ki kam jong ka party la leh lyngba ki jingaibor bad ki briew ba la ithuh da ka party. “Kino kino ki kam jong ka party la leh da ka rukom kaba dei bad da ki briew kiba la pynkupbor da ki nongïalam ba halor jong ka party,” ong u Bah Kharkrang.
U nongaiktien jong ka BJP u la ïaiban ba ka jingthmu jong ka party ka long beit halor ka synshar kaba khuid, ka jingbha jong ka jylla, ka jingpynïaid beit ïa ka synshar ka khadar.
“Ka jingainam ai ka view point kam lah ban long ka mat jong ka party kum ka BJP,” u la ong bad bynrap ruh ba ka jingangnud jong ka pary ka long ban phaikhmat sha ki mat kiba ïadei bad ki paidbah nongshong shnong ka jylla.
