Shillong, Rymphang 08: Ka Hynñiewtrep Youth Development Council (HYDC) Mawryngkneng Circle ha ka sngi Saitjaiñ ka la pynbna ba kan pynlong ïa ka rynsan ïatyrko nia ha ka 15 tarik mynta u bnai hapdeng ki hynriew ngut ki kyrtong ki ban ïakhun ïa ka elekshon sha ka Khasi Hills Autonomous District Council (KHADC) na Sohryngkham Constituency.
U President jong ka HYDC Mawryngkneng Circle Bah Robin Nongrum haba kren sha ki lad pathai khubor la ong, ha kane ka jingïatai yn ym shah ïa ki kyrtong ba kin phah da ki nongïalam jong ka party jong ki hynrei kin hap kren beit dalade.
Ha kane ka jingïatai yn shah tang ïa ki kyrtong ban pynksan la ki jong ki nia khnang ba ki paidbah ka Constituency kin dup ïohsngew ïa ki ñia ki jutang jong ki kyrtong jong ki kyrtong shuwa ba kin leit ban thep ïa ka vote ha ka 21 tarik, mynta u bnai.
U la ïathuh ba haduh mynta na ki 6 ngut ki kyrtong kiba la pyntikna ki don lai ngut, kata, u kyrtong ka Congress, ka NPP bad u kyrtong jong ka KHNAM.
“Ha kane ka rynsan yn sa ailad ruh ïa ki paidbah ba kin buh jingkylli da kaba phah lypa ïa ki jingkylli lyngba ka WhatsApp, kata, ha u nombar: 8256977359/9863778956,” u la ong.
“Lada bun ki jingkylli bad lada ki dei kijuh ki jingkylli ngin shim beit tang kawei da kaba yn buh ïa ka borti ha ka jaka ba la pynkhreh. Ngi kyrpad ruh ïa ki paidbah ba kin wan sakhi ïa kane ka jingïatai nia,” u la bynrap.
“Lada ki don da ki hajar tylli ki jingkylli ha kato ka sngi, ka seng kan sa pynbeit kumno ban leh,” la ïathuh u Bah Nongrum.
U la pynshai ruh ka seng hi kam don bynta eiei ruh em bad kano kano ka seng saiñpyrthei. “Ha kane ka sngi, na ka liang ka seng ngin shu long tang ki Volunteer hynrei ngin ym pynïaid satia ïa ka jingïatyrko nia katba ki nongpynïaid ngin sa jied da kiba nabar ym da ki briew jong ka seng,” la ïathuh u Bah Nongrum.
U Bah Nongrum u la ïathuh ba kane ka jingpyrshang jong ka seng ban khot ïatai tang ïa ki kyrtong ka long namarba kiba bun na ki riewpaidbah ki kwah ban ïohsngew ïa ki nia ki jutang jong ki kyrtong namar ha kiba bun ki khep ki paidbah ki ïohsngew beit tang ïa ki jingkren jong ki nongïalam jong ki party.
