Shillong, Ïaiong 16: U State General Secretary ka Bharatiya Janata Party (BJP) Meghalaya State Unit Bah Wankitbok Pohshna ha ka sngi Balang u la kynnoh ba Congress ka ïaid ryngkat bad ka kam bamsap.
Ïa kane u Bah Wankitbok u la kren daka ba pyntip ba ki ar ngut ki nongïalam ba hakhlieh jong ka Congress, kata, ka Sonia Gandhi bad u Nongïalam ka Liangpyrshah ha Lok Sabha u Rahul Gandhi ki la shah pynngat kyndon hapoh ka Prevention of Money Laundering Act (PMLA) 2002.
Ha ka jingïakren bad ki lad pathai khubor u Bah Wankitbok u la ong ba ka Sonia Gandhi bad u Rahul Gandhi bad kiwei ki nongïalam ka seng Congress ki la shah pynngat lang hapoh ka National Herald Case.
U la kynnoh ba hapoh ka jingïalam jong ka Sonia bad u Rahul Gandhi ka la don ka jingpynïaid bakla ïa ka pisa bad ki la don ruh ki sakhi sabut ban pynshisha ba kine ar ngut ki nongïalam jong ka Congress ki donkti.
“Ngi kum ki nongshong shnong ka Meghalaya ngi kwah ban buh jingkylli ïa ka Congress hato ka Congress kam ïaid ryngkat ryngkat bad ka kam bamsap khamtam mynta, ki sakhi sabut ki la paw pyrthei lut,” la kynnoh u Bah Wankitbok.
U Bah Pohshna u la ong ba ïa ka Associated Journals Limited (AJL) la aiti sha ka Young India Private Limited (YIL) da ka shu leh thok ha kaba haduh 76% la kam trai da ka Sonia Gandhi bad u Rahul Gandhi.
“Mynta ki sakhi sabut ki la paw pyrthei ba kumno ki jingdon jingem jong ka AJL la pynkylla sha ka Company shimet jong ka iing ka sem jong ka Sonia Gandhi” u la kynnoh.
U la ong ba ïak a National Herald la seng ha u snem 1937 kum shi bynta ban pynshlur ïa ka mynsiem ïakhun laitluid jogn ka ri ïa ki paidbah ka Ri India ha kaba palat 5000 ngut nongïakhun ka laitluid ka Ri ki dei trai ha ka AJL.
“Mynta kito kiba dei trai lang ïa ka AJL ki la shah thok pisa kaba ym duna T.5000 klur ha kaba ïa kane ka Company la aiti noh sha ka Company shimet ba dei trai da ka kawei ka longiing kaba kam trai haduh 76%” u la ong.
U la ong ba ka Congress ka dei ban sangeh ïa ka jingleh drama hynrei ka dei ban ailad ïa ka aiñ jong ka ri ban leh ïa la kam kamram khnang ba kito kiba dei trai lang ïa ka AJL kin ioh ïa ka jingbishar hok.
