Shillong, Nailur, 13: Ka University of Science and Technology Meghalaya (USTM) ka la pynpaw ïa ka jingsngewsih tang shu ïoh ïa ka khubor ba u Dr. Donwa Dethwelson Lapang uba la long teng u Myntri Rangbah barim ka jylla u la khladnoh ha ka miet sngi Thohdieng ha Bethany Hospital, Shillong ha ka rta kaba 91 snem.
Ha ka jingïalang sngewlem, ka kynhun jong ka USTM baroh kawei, kaba kynthup ïa ki 6000 ngut ki nongtrei, ki Dean, ki Director, ki Principal, ki Head of Department, ki nonghikai, ki samla pule bad ki nongtrei ki la ïalum lang ha Amenity Centre ban pynpaw ïa ka jingsngewsih halor ka jingkhlad noh jong u Dr. Lapang uba la buh matti ha ka jingïaid lynti jong ka skulbah.
Ha ba pynpaw ïa ka jingsngewsih, u Chancellor Mahbubul Hoque u la ong, “ka jingkyrshan ba kordor jong u Myntri Rangbah barim u D.D Lapang, ka jingstad, bad ka jingai mynsiem ki la long ki atiar ban saiñdur ïa ka jingïaid lynti jong ka USTM. Ka ai ïa nga ka jingsngewhun kaba khraw ba ngi la lah ban jer kyrteng ïa kawei ka Amenity Centre ha ka kyrteng jong u ïa kaba la plie paidbah hi da Dr. Lapang. Kane ka dei artat ka jingwan iuhkjat kaba khatduh sha USTM!”
U Vice Chancellor Prof. G.D. Sharma u la ong, “U la long ka bor ba ïalam ïa ka jingïaid lynti jong ka jingpule jong ka USTM, uba ka jingai mynsiem jong u kan dang ïai bteng ban pynwan dur ïa ka thong jong ngi.”
Ka USTM ka la pynlong ruh ïa ka jingbuh syntiew ba kyrpang bad ki jingduwai na ka bynta jong u Dr. Lapang ha Amenity Centre. Ïa ka Amenity Centre, Block F, la ai kyrteng da kaba shu jia ryngkhat kum ka Dr. D.D. Lapang Block, kaba u la plie hi dalade ha u bnai Naitung, 2023. Ha katei ka por, u Dr. Lapang u la pynkynmaw ïa ki por ba mynshwa ba ha kane ka jaka ka bym seisoh hynrei ka la ieng pynban da ka shlem pule kaba pawnam. U la ong ïa ka USTM, “ngan don junom ha ka liang jong phi.”
Kum u Myntri Rangbah ka jylla Meghalaya, u la don ka bynta kaba kongsan ha kaba seng ïa ka Regional Institute of Science and Technology (RIST) ha u snem 2009 ka jaka pule kaba nyngkong eh ha kaba mynta ka long ka jaka pule jong ka USTM kaba dang kiew stet bha. Ka jinglong nongïalam jong u ka sakhi ïa ki jingtei, ka pule puthi bad ka roi ka par ha ka imlang sahlang ha kylleng ka thaiñ.
Ïa u Dr. D.D Lapang uba la ñiew ruh kum u “Kpa jong ka them Ri-Bhoi,” um shym la long tang u nongsynshar uba don ka jingïohi jngai hynrei u nongsynshar ba khlem sangeh na ka bynta ka hok bad ka roi ka par kaba kynthup lang ïa baroh. Ka jingim jong u ka long kaba janai, kaba mynsiem kaba sngewrit bad kaba shakri, ka long ka sharak jong ka jingkyrmen bad ka bor na ka bynta baroh, la ong shuh shuh ki nonghikai ka USTM.
Ka kynhun ki nonghikai bad ki samla pule ka USTM ki la leit sngewlem ruh ha ka ïingsah jong u Dr. Lapang ha nongbah Shillong ban ai khublei khatduh ïa u.
