Shillong, K’ Lyngkot 04: Ka Dorbar ki Rangbah Kur ka Bri Hynñiewtrep kan long ha ka 7 tarik Kyllalyngkot, 2025 ha ka Ïing Dorbar, Mission Compound ha ka por 10:00 baje mynstep. La wer sngewbha ïa ki rangbah kur nongïalam na baroh ki kur ha ka Bri Hynñiewtrep ban wan shim bynta ha ka dorbar kaba ryngkhi bad ka Lyngkhuh San Snem jong ka Synjuk Ki Rangbah Kur.
Ka Bri u Hynñiewtrep. Katkum ba la lum thup ki don haduh palat san hajar tylli ki kur ki jait ba ym lah ban pyntip kyrpang shimet, kumta la kyrpad ba kane ka long ban wer lang ïa baroh ki dkhot rangbah mar lai ngut na ki Seng Kur bad ki kynhun Kur naphang ban ïa poi ryntih sha kane ka Dorbar ki Kur ki Jait.
Kumta la kyrpad ban sngewbha wan khnang khnang sha ka dorbar ban ïatai halor ka phang kaba dei ban pynneh pynsah ïa ka riti kheiñkur kheiñkha na ka kmie. Ka jingdon ryngkat kaba ryntih da baroh ki kur kan long ka jingai mynsiem bad ka burom ïa ka ri bad ka jaitbynriew shityllup ka bri u Hynñiewtrep.
Ki kynrem ki lyndan na ka Dorbar Thawaiñ Dalariti Rilum Khasi (KHADC) bad Rilum Jaiñtia (JHADC) ha ryngkat bad ki Syiem ki Kmie, ki Lyngdoh jong ki hima, ki Doloi jong ki elaka, ki Sirdar bad Wahadadar jong ki elaka kin ïadon ryngkat ban pynphuh pynphieng bad sam la ki jingtip shaphang ka thymmei jong ka longkur longkha ha ka Bri Hynñiewtrep.
Nalor ki jingkren da ki kongsan, yn ïoh ruh ka jingkren lamphang na u Bah R L Kharpran, Khlieh Rangbah ka Synjuk Ki Rangbah Kur bad na ka longkmie, Kong (Dr) Streamlet Dkhar. Ha ka kyllasngi kan don ruh ka shlem-mir-nia ban pynïaid da u Bah Erwin K Syiem Sutnga bad ki jingkren na u Bah Rapionglang Blah, Bah R S Khardewsaw bad ka jingshimbynta na ki rangbah kur na ki shnat bapher bapher, kynthup ruh ki jynthoh da ka longkmie Dr. M R P Lyngdoh, Bah Ploster Syiem bad ka kynthoh ïawai na u Bah Raphael Warjri.
