Shillong, Lber, 02: La plie paidbah ïa ka Duia Trailblazers Adventure Training Academy ha ka Sngi Saitjaiñ.
Ka jingthmu jong kane ka Academy kaba long na ka bynta ki kam jngohkai pyrthei ha ka jylla Meghalaya bad ka thaiñ shatei lammihngi jong ka Ri India baroh kawei ïa kaba la plie paidbah da u Working President jong ka Meghalaya Olympics Association u Bah John Kharshiing ha ryngkat ka jingsakhi lang jong ki dkhot ka Dorbar Shnong Sohryngkham, u Bah Gerald S. Duia uba seng ïa ka Duia Trailblazers, uba long ruh uwei na ki Eco-Tours Operator ha Meghalaya, u Bah Phrangkupar Kharbamon bad kiwei kiwei.
Kane ka Academy ka dei shlem kaba nyngkong eh ha Meghalaya bad ha ka thain Shatei Lammihngi kaba ai jinghikai pyntbit lyngba ka Adventure Tourism Training Center. Ki jinghikai kum ka Tour Guiding, Caving, Canyoning, Water safety, Trekking, First Aid & CPR Certification.
Lyngba ka jingkyrshan jingïarap pisa na ka PRIME Meghalaya ka kynhun jong ka Duia Trailblazers ka la ïoh ïa ka jingïarap ban shna ïa ka Advanced Training Centre ha ka Adventure Tourism.
Ïa kane ka Academy la sdang da u samla Gerald Duia bad u Bah Phrangkupar Kharbamon. U samla Gerald u long ruh u Eco Tour Operator na Meghalaya uba pynïaid ïa ki Eco bad Cultural Tour ha Meghalaya bad u Bah Phrangkupar pat u long u nonghikai ha ki jingpule jong ka sap Tourism la bun snem ha Meghalaya.
Lyngba ka jingïatreilang jong kine arngut mynta lah seng ïa kane ka Academy na ka bynta ban hikai pyntbit ïa ki khynnah samla ka jylla kiba don sap ha ka Adventure Tour Guiding, Caving, Canyoning, Water Safety, First Aid bad CPR.
