Shillong, Nailar, 09: U Secretary ka Meghalaya Pradesh Congress Committee (MPCC) u Bah Manuel Badwar ha ka sngi Saitjaiñ u la dawa ban dei ban don ka jingai jingtip kaba thikna ha kaba ïadei bad ka jingthep vote bad u la ong ruh ba donkam ban wanrah ki jingpynbeit ba dei ban shim da ka Election Commission of India (ECI) ha kaba ïadei bad ka kam elekshon ha Mahadevapura (Bengaluru) haba la kynnoh ba ka don ka jingpyndonkam bakla ne pyndam ïa ki electoral roll.
U la ong ba kane kam dei satia ka kam jong ki seng saiñ pyrthei hynrei kadei ka jingkular ha kaba uwei u briew thep ïa ka vote. Lada ka thup kiba thep kyrteng kadei kaba bakla ka jingmih ha ka election kan ym long kaba bha.
“Ka jingthep vote kaba khuid kan ïada lang ïa baroh. Ngim shym la dawa ïa ka jingshim kabu hynrei na ka bynta jong ka kam ba kan long kaba ïaid beit. Ki la don kumba 6 bnai ha kaba ki dkhot kumba 40 ngut ki la khmih bniah halor ka electoral roll na Mahadevapura Assembly da kaba pyndonkam ïa ka jingkheiñ na ka ECI bad ki jingleit wad jingshisha ha kaba ïadei bad kane ka kam,” ong u nongïalam ka seng Congress.
U la ong ruh ba na ka jingkheiñ kaba la antad 6.5 lak kiba la shah pynrung kyrteng ki la don kumba 1,00,250 ngut kiba la ïohi ba ki long kiba bakla bad kiba don ka jingartatien.
U la ïathuh ruh ba ki nongthep vote duplicate ki la don kumba 11,965 ngut ha kaba ki briew ki mih kyrteng ha kiba bun ki jaka thep vote ha ki jylla bapher bapher.
Ki la don ruh kumba 40,009 ngut ki address kiba khlem don kyrteng ne ki bym lah ban pynshisha ba kynthup ruh ïa ki ïing bad ki kyrteng jong ki kmie ki kpa kiba la ai ki dei ki bym don jingmut.
Ki la don ruh ki jingai address jong ki riew shimet kumba 10,452 ha ka thup kyrteng kum ka nuksa ba ki don kumba 80 ngut ki nongthep vote kiba la pyni ba ki sah lang ha kajuh ka kamra bad kumba 46 ngut ki nongthep vote kiba sah tang ha kawei ka ïing kaba don tang kawei ka jingthiah.
“Balei ïa kane la hap ban ïakren lang ha Meghalaya, naba ka la jia ha kawei ka jaka, ka lah ban jia ruh ha kiwei ki jaka. Haba peit ïa ka election ha East Khasi Hills, West Khasi Hills, Ri-Bhoi, Jaiñtia Hills, ne Garo Hills lada ïoh rung ki kyrteng kiba bakla kan ktah ïa ki nongthep vote kiba shida bad kane kan ktah ruh ïa ka jingmih ka result bad kan ïalam bakla ruh ïa ka jingkheiñ,” u la ong.
U la ong ruh ba ki 5 tylli ki jingdawa na ka MPCC sha ka ECI ka long ban ïoh ïa ka jingtrei kaba khuid, kaba don ki sakhi kiba don kam ha kane ka ri synshar paidbah, nangta ba donkam ban pynmih ïa ki jingkheiñ kiba long ruh katkum ki jingring video ha kaba ki nongshong shnong kin lah ban khmih bad ban peit.
Na ka liang jong u, ula ong ba ka kam synshar paidbah kan ym ïap tang da ka jingpynbthei kaba shisien, hynrei lada pynsngap jubor kan ktah pat hadien habud, kumta donkam ban pynkhuid ïa kane ka bynta da kaba ïatreilang.
