Jowai, Lber 29: U kyrtong shimet na ka Shillong Parliamentary Constituency u Prof Lakhon Kma u la hiar sha sor Jowai ban ialap sha ki paidbah ia ki mat bad ki jingthmu jong u na ka bynta ka election MP Lok Sabha ka ban long ha ka 19 tarik Iaiong.
Ia ka jingialang la pynlong ha Iawmusiang, Jowai ha ka 28 tarik Lber.
U Lakhon Kma ha ka jingkren ula ong ka jingmih madan jong u ban iakhun ia kane ka ilekshon MP kadei halor ka nongrim ban wanrah ia ka jylla Meghalaya kaba thymmai kaba lait na ka jingsahdien, ka jingbamsap bad ruh ban rah ia ka jylla ha ka ioh ka kot bad kiwei kiwei.
U la ong lada ki paidbah ki mon ban jied ia u kum u MP, ka mat kaba hakhmat kaba u buh ka long ban saindur thymmai i aka pule puthi hapoh ka jylla, un iakhun ban pynrung ia ka ktien Khasi hapoh ka Khyrnit kaba Phra jong ka Constitution ka ri khnang ba ki samla kin iohlad ban thoh ia ki exam bapher bapher da ka ktien Khasi nalor kiwei kiwei.
Nalorkata ula ong, kane ka Election MP kam dei ban thaw ia ka EC hapoh JHADC, lane ban thaw sorkar hapoh Assembly hynrei ka dei ka election ban phah tang ia uwei hi u briew u ban rah ia ka jingeh bad ka sur jong ki 7 tylli ki district jong ka Shillong Parliamentary Constituency.
