Shillong, Jymmang, 24: U Nongïalam ka Liang Pyrshah u Dr. Mukul Sangma u la pynpaw ba ka Ïingbishar ka dei ban shimkhia halor ka jingpyndonkam bakla ïa ka bor da ka Sorkar Jylla ha kiba bun ki khep kaba ïalam sha ka ‘jingkhñiot ïa ka hok’.
Haba kren sha ki nongthoh khubor ha ka sngi Thohdieng, u Dr. Mukul u la ong, “kane ka Sorkar ka la pyndonkam bakla ïa ka bor ka iktiar ha kiba bun ki khep.”
U la pynpaw ïa kane halor ka jingpynkynriah kaba khah khah ïa ki Superintendent of Police bad ïa ki Investigating Officer.
“Phi peit ha kiba bun ki khep ba la ujor ejahar ha ki thanat bapher bapher ha kylleng ka jylla kiba ïadei bad ki kam runar kiba lah ban tip hynrei hadien ba la slem bha ki pyntip sha ka Ïingbishar ba ym shym la don satia ki sakhi ban pynshisha ïa ki jingkynnoh pyrshah ïa u nongshah kynnoh kum ka nuksa ka jingkhaii dewiong beaiñ, haduh katno tylli ki ejahar ba ladep ujor ha kylleng ka jylla, katno ngut ki la lah ban pyni ba ka dei shisha ka jingleh be-aiñ kaba la khring ïa ki kyndon jong ki aiñ ba ïadei jong ka MMDR bad kiwei kiwei bad kumta la pynngat ïa ki ha ki kyndon aiñ. Kumno phin pynngat ha ki kyndon aiñ haba la pynkynriah ïa ki ophisar na kawei ka jaka sha kawei pat. Hangno shuh kata ka jingbteng ïa ka jingtip shaphang ka case,” la kynthoh u Dr. Mukul.
“Kumta khlempep ka Sorkar ka la pyndonkam bakla ïa ka bor jong ka. Katno ngut ki SP ki la shah pynkynriah kam, katno ngut ki Pulit ki la shah pynkynriah kam, katno ngut ki Investigating Officer, kiba tohkit ïa ki case kiba heh ba la shah pynkynriah kam? Wat ïa ka case kaba heh ha Laitumkhrah u ophisar uba la shah bynshet ban tohkit u la shah pynkynriah kam bad haba u SP u la kren ïa kane, u SP ruh u la shah pynkynriah kam,” la kynnoh u Nongïalam ka Liang Pyrshah.
Haba kyntu ïa ka Ïingbishar ban shimkhia ïa kane ka jingpyndonkam bakla ïa ka bor, u Dr. Mukul u la ong, “kane (ka jingpynkynriah kam ïa ki ophisar) ka dei ka jingpyndonkam bakla ïa ka bor ïa kaba ka Ïingbishar ka dei ban shim khia namar ka jingtohkit bad ka jingpynngat mukotduma ka dei ka bynta kaba kongsan jong ka jingbishar ïa ka hok.”
“Namarkata, lada ka Sorkar ka pyndonkam ïa kane ka lynti ka ïadon bynta ha ka jingkhñiot ïa ka hok. Namarkata, wat hapdeng ka jingpynïakhlad ïa ka bor synshar na ka bor bishar, kam ïarap satia,” u la bynrap.
Shuh shuh, u Myntri Rangbah barim u la kdew ruh ïa ka jingujor jong u sha u Chairman jong ka Lokayukta ha kaba ïadei bad ka jingtohkit da ka CBI bad u la ong, “…phi la ïohi ïa ka jingmih na kawei na ki shithi jong nga kaba la thoh sha u Chief Secrtary bad sha ka Lokayukta Justice Mooshahary mynba u la long u Chairman jong ka Lokayukta, nangta kaei kaba jia ïa ka jingtohkit, ka jinghukum ban phah tohkit CBI ki pynslem ïa ka jingtohkit ba la hukum da u Lokayukta. Mynta, kane ka pynmih ïa u dak jingkylli uba heh.”
“Mynta phi don bun ki mukotduma ba ïadei bad ki jingkynnoh pyndonkam bakla ïa ka pisa paidbah ha kaba ïadei bad ka GHADC. Hato ka la don kano kano ka jingtohkit bad jingpynngat mukotduma lane kaba pynkut noh ïa ka mukotduma bad kaba ïadei bad ki kyndon jong ka ain, kam long kumta, ki don bun kiwei pat kiei kiei,” u la ong shuh shuh.
 | ReplyForwardAdd reaction |
