Ki longshwa manshwa jong ngi ki ju ïathuh khana ïa ngi shaphang kata ka ‘Juk shong kulai miaw’, ‘ka juk kiew dieng sohmynmen’, ‘ka juk kylla khongpong’ bad bun jait kiwei kiwei.
Shisien pyrkhat, kata ka jingkren jong ki, sngew kumba kadei tang ka biria bad kaba sngew sammut, hynrei katba nang ïaid ka por pat, ka la kylla long pynban ka jingshisha bad kaba dei.
Ha ki por mynshwa, ki briew ki dang khyndiat bad ki dang duna ruh ha ka jingnang jingstad hynrei ki im shisur shidur, ki im hok ryngkat ka akor ka burom bad ka tip briew ka tip Blei. ‘U Khasi mynshwa,watla u tare thlip thlip ha ka jingdum hynrei u long pat uba stad namar u tip bad tieng bha ïa U Blei’. Haba peit pat ïa kane ka juk kaba mynta, kaba ki kam hana, ba ka dei ka juk shai ba la nang la stad, ka la long ka juk kaba la ima bad shyrkhei pynban shibun.
Ka jingleh banang ba stad palat kane ka juk ka la ïalam pynban sha kaba bakla ym tang ha ka rukom pyrkhat pyrdaiñ hynrei ha ka liang ka akor ka burom ruh kumjuh.
Mynshwa,shisien ba la nang kiew ha ka kyrdan pule, katta ki la nang kham kiew bad kham janai ruh ha ka akor ka burom. Ïa kiba kiew ha ka kyrdan pule bad ka akor ka burom ki briew ki burom bad lehraiñ la kum ka sngi-u bnai. Ki da nang bad don akor shisha ym tang ha ka ktien ka thylliej hynrei ha ki kam ruh kumjuh.
Phai keiñ sha kane ka juk shai mynta, kaba la i-poh dor bad jah burom hi khait kum ka jaitbynriew.
Nalor ba ki saitlah, ka leh stad bad kim salia shuh wat ïa ka akor briew ka akor Blei ruh.
Mynta, katba nang kiew ha ka jingnang jingstad, i kumba ki nang hiar pynban ha ka akor ka burom. Mynshwa, ki nang shwa ka leh tip briew bad khlem artatien (automatically) kan sa poi hi kha-ma-kha sa ka tip Blei.
Mynta pat, ki nang tang ban leh tip Blei thik thik khlem pat nang pat ïa ka leh tip briew. Kam don jingmut ban shu leh tip Blei khlem pat nang ka leh tip briew.
Lada phim nang ban phong ne riam da ka patlun ba pynpei thiew naduh kjat ter ter, kata, phim pat long satia uba standard ha kane ka juk mynta. Lada phim nang ban pynieng shniuh kum u brush ne ai rong shniuh da ki jait rong ba laiphew jait, kin khot biej ïa phi. Lada phim nang ban deng prek ha shkor bad ki dur khmat baroh, ki dang khot juk maw ïa phi. Lada phim nang ban tuh ban thok, phin sahjit ei sha kyndong bad kumta ter ter.
Tangba kynmaw bha, ‘ka Hok ka kyntiew ïa ka jaitbynriew. Ka Hok bad ka akor ka burom kaba tam ha kane ka pyrthei’.
