Shillong, Jylliew, 02: Ka A’chik Conscious Holistically“Integrated Krima (ACHIK) ka la phah da ka dorkhas sha u Lat ka Jylla u CH Vijayashankar halor ka jingdawa ban pynbna Winter Capital ïa ka nongbah Tura khnang ba ka jingpyntuid ïa ki song pynroi kan long mar katjuh ha rilum Garo kumba long ha kiwei kiwei ki bynta jong ka jylla Meghalaya.
Ha ka jingïakren bad ki lad pathai khubor ha ka Lah Sngi u Blei ki nongïalam jong ka seng ki la dawa ïa ka Sorkar ba kan pynbna noh ïa ka Tura kum ka Winter Capital, ban nang pynpynkynriah noh khyndiat pa khyndiat ïa ki tnat treikam sha Tura, ban pyntreikam noh ïa ka ingsah jong u Lat ka jylla ha Tura bad ban shna noh ïa ka Winter Assembly ha Tura bad nalor kata kane ka kynhun ka la dawa ruh ïa ka Sokar ban buh noh ïa ka Bench jong ka ingbishar High Court ha Tura.
Ki la ong ba ka rilum Garo kaba la shah iehbeiñ la slem bha ha ka jingai ïa ki song pynroi, mynta ka wad “ïa ka jingpynbeit kaba don jingmut katkum ka polisi treikam.”
Shuh shuh ki la ong ba ki jingdawa ki long kiba la pynshong nongrim ym ha ka hamsaïa, hynrei ha ka jinglong kaba mar ryngkat ha ka riti synshar, ka jingbishar hok ïa ka thain, bad ka dor jong ka synshar paidbah kaba la pynskhem ha ka ri jong ngi.
Ki la ïaiban ba ki nongrim jingdawa ban pynbna ïa ka Tura kum ka Winter Capital jong ka jylla Meghalaya, kaba katkum ka jingïohi jong ki kan long ym tang ban pynjan ïa ka synshar ka khadar hynrei kan pynbeit ruh ïa ki rukom bhah ïa ki song pynroi bad ïa ka jingshah iehbeiñ wat ha ka synshar ka khadar.
Ki la ong ba ka ka jingtreikam mar kylliang jong ka Secretariat bad ka Ïingdorbar Thaw Aiñ hapdeng ka Shillong bad “Tura” kan pynbha ïa ka jingsynshar jong ka Jylla khamtam ha rilum Garo.
