Shillong, Nailur, 10: Ka United Democratic Party (UDP) ka la kyntu ïa ka sorkar Meghalaya Democratic Alliance (MDA) ba kan shim ïa ki sienjam ba tyngeh ban kyrpad ïa ka Sorkar Pdeng ba kan pyntreikam noh mardor ïa ka Inner Line Permit (ILP) bad ban wanrah ïa ka aiñ thymmai jong ka jylla na ka bynta ban khanglad ïa ka jingwan tuid bad ka jingwan buhai shnong beaiñ ki mynder ri sha kane ka jylla.
Ha ka shithi ba la aiti ha u Myntri Rangbah ka jylla u Conrad K. Sangma ha ka sngi Balang, u General Secretary ka UDP u Bah Titosstarwell Chyne u la ong, “ngi sngewnguh shibun ïa phi, ïa ka Sorkar jong phi bad ïa baroh ki MLA kiba la mynjur ïa ka Resolution kaba kyntu ïa ka Sorkar Pdeng ban pyntreikam noh ïa ka Bengal Eastern Frontier Regulation 1873 ha ka jylla. Hynrei, ka Sorkar India haduh kine ki sngi kam pat ai jingmynjur ban pyntreikam ïa ka ILP ha ka Jylla, ha kane ka bynta ngi kwah ban ai jingmut ïa ka Sorkar Jylla ryngkat bad ki kynhun bapher bapher jong ka Jylla ban shim ïa ka sienjam kaba tyngeh ban kyntu ïa ka Sorkar Pdeng ban mynjur ïa ka resolution ban pyntreikam ïa ka ILP ha ka Jylla.”
Ka UDP ka la kyrshan ïa kane ka rai jong ka Sorkar ban wanrah ïa ka aiñ kaba thymmai ban khanglad bad ban peitngor ïa ka jingwan buhai shnong jong ki briew kiba nabar kaba ïasyriem bad ka Meghalaya Regulation of Scheduled Areas (MRSSA) Act, 2016.
“Ka Ïingdorbar Thawaiñ ka Jylla Meghalaya ka la mynjur ïa ka MRSSA 2016 bad hapoh ka jingïalam jong phi ka Sorkar ka la mynjur ïa ka MRSS (Amendment) Bill, 2020 hynrei haduh mynta kam pat ïoh ïa ka jingmynjur jong ka. Ngi la ïohi ïa ka jingkren jong phi ba ka Sorkar Jylla mynta ka pynkhreh ban wanrah ïa ka aiñ kaba thymmai kaba la ïasyriem kum ka MRSSA ban pynlah ïa ka jylla ban pynbeit bad peitngor ïa ka jingwan rung ki nongwan buhai shnong mynder ri. Ngi kyrshan pura ïa ki sienjam ba la shim da ka Sorkar bad ngi kwah ban ai jingmut ba ka Sorkar ka dei ban wanrah kham kloi ïa ka aiñ,” ong u Bah Chyne.
Ka party ka la ai jingmut ban pynkhlaiñ ïa ka Directorate of Infiltration da kaba thaw ïa la ka jong ka Battalion, ban buh ïa ki shnat treikam ba kyrpang ha manla ki Police Station bad ban buh ruh ïa ki khyrdop ban talasi ïa ki nongwan rung tuh ha ki bynta ba kongsan jong ka jylla.
Ka UDP ka la kyntu ïa ka Sorkar ba ka dei ban pynkhlaiñ ïa ka jingdon jong ki nongtrei ha ka District Task Force, kaba la thaw na ka bynta ban thwet bad ban pynphai ïa ki mynder ri.
Ka party ka la kyntu ïa ka Sorkar ba kan pynthikna ba ka tnad Labour kan pyntreikam hok ïa ka Meghalaya Identification, Registration (Safety & Security) of Migrant Workers Act, 2020 bad ïa ka Interstate Migrants Workmen (Regulation of Employment and Conditions of Service) Act, 1979.
