Shillong, Naitung, 04: U nongïalam ka BJP uba dei ruh u Myntri Sorkar Bah AL Hek ha ka sngi Thohdieng u la ong ba ka jingpyntreikam ïa kino kino ki aiñ la ka long ka Inner Line Permit (ILP) ne ka Meghalaya Residents, Safety and Security Act (MRSSA) kim dei ban long mawjynthud ïa uno uno u nongshong shnong jong ka ri India.
“Phi lah ban wanrah ïa kano kano ka aiñ ba pyrkhing, ka ILP ne ka MRSSA. Hynrei watla katta ruh ym dei ban pyndik ïa baroh ki nongshong shnong ka ri India. Ym dei ban don mano mano ruh ban pyndik. Kata ka dei ka jingïohi kaba shai bad ka mat kaba shai jong nga. Ym dei ban pyndik ïano ïano ruh,” la ong u Bah Hek haba kren sha ki lad pathai khubor.
Hynrei u la ong ba ka Sorkar Jylla ka don leh la kamram ban pyntreikam ïa ka MRSSA ha ka jylla khnang ban weng ïa ki jingeh na ka jingwan tuid khlem sangeh da ki briew kiba nabar sha ka jylla.
Katba ïa ka jingpyntreikam ïa ka ILP, u Bah Hek u la ong ba kane ka kam ka dang sahteng bad ka Sorkar Pdeng ban shim ïa ka rai.
Ka Iingdorbar Thawaiñ da kawei ka sur ka la mynjur ïa ka Resolution ha u snem 2019 ban kyntu ïa ka Sorkar Pdeng ba kan pyntreikam ïa ka ILP.
U Bah Hek u la ong ba ka BJP kan ai jingkyrshan ïa ka rai jong ka Sorkar Jylla khnang ban pynthikna ïa ka jingpyntreikam ïa ka ILP ha ka jylla.
Haba kylli, hato ka kham khlaiñ ka MRSSA ban ïa ka ILP, u Bah Hek u la ong ba um dei satia u briew uba lah ban ai rai halor kine ki ar tylli ki aiñ.
“Tad haduh ba ngin da pyntreikam ïa ka, ïathuh ïa nga kumno ngin bishar ïa ka la ka long kaba bha ne kaba sniew. Kata kam lah ban long ban ïathuh lypa bad lada ym pat lah ban pyntreikam ïa (kum kata) ka aiñ,” u la pynpaw shuh shuh.
