Jowai, Risaw 05 : Ki nongialam jong ka seng ki samla pule ka Khasi Students Union, East Jaintia Hills District Unit ki la pynpaw ka jingsngew khia halor ka jingbym iasnoh kti lang jong baroh ki nongniah kali kiba ju iaid lyngba na ka surok national highway-6 ha East Jaintia Hills District, ki bym burom lem ia ka jingkyrpad ka seng, kaba la buh ka jingkyrpad ban sangeh ban iaid kali ha ka por mynmiet kata naduh ka por 7 baje mynmiet haduh ka por 5 baje mynstep.
U General Secretary ka KSU East Jaintia Hills District, u Bah K.S. Suchiang, u la ong ba kane ka jingkyntu ia baroh ban sangeh ban niah kali la lap ba ki don bun na ki nongniah kali ki bym treh ban iasnoh kti lang bad ka seng, namar ki don tang shi pawa kiba la iasnoh kti lang bad ka seng ki bym iaid kali shuh ha ka por mynmiet, kane ka paw ba imat ki nongniah kali ki sngewtynnad, ki kmen beit ban iaid watla ka surok ka sniew bad jot rathai.Ha ka jingshisha ka seng ka kwah eh ba baroh ki paidbah kin suk ha ka leit ka wan da kaba iaid na ka surok kaba bha ba miat bad ka seng ka ju sngap ruh ia ki jingud ki paidbah kiba iakynduh jingeh ha ka leit ka wan bad ka seng ka la shim ruh ia ka sienjam ban pynlong da ka jingiakhih, hynrei balei pat ki paidbah khamtam kiba niah kali kim treh pat ban ia shim bynta lang haba ka seng ka kyntu bad kyrpad ban sangeh ban niah kali ha ka por mynmiet ban long kum ka dak ban pynpaw ia ka jingpyrshah halor ka jingleh bymsuidniew ka NHAI bad ka Sorkar Jylla u la ong.
Shuh shuh utei u nongialam ka seng, u la ong ba kane ka jingkyrpad jong ka seng ban nym iaid kali ha ka por mynmiet ka la kut noh ha ka 2 tarik Risaw 2023 ha ka por 5 baje mynstep bad ka la dap shi taiew kynthih, kata naduh ka 25 tarik u nailur.
Hapoh kine ki shi taiew la ong ba ym shym la don kano kano ka jingjia ba sngewsih ne ka huri hura bad tang kawei kaba pynpyrkhat ia ka seng ka dei namar ka jingbym ia shim bynta ryntih ki nongniah kali ban sangeh ban iaid kali ha ka por mynmiet.U la ong ba ka seng hi kan sa shong pyrkhat biang halor kane ka jinglong jingman ka surok NH-6, kawei ba ka seng ka kwah ka dei ba ki paidbah bad ki nongniah kali baroh kin sngewbha ban ai mynsiem lem ia ka seng da kaba iasnohkti lang bad ka seng ha kano kano ka por.
Kumba long mynta, ka surok national highway ha East Jaintia Hills District, khamtam ha ka thain Narpuh ka la buh jingma bad buh jingeh bha ia ki paidbah nongleit nongwan, ka jingdheng kali ruh ka jur bha ha katei ka thain na ka daw ka jingsniew palat ka surok. Ka NHAI kam dei ban shu maramot, hynrei ban siang rong biang noh namar ka bneng ka la shah ban leh kumta.
