Shillong, Naitung, 15: U Myntri ka tnad bording ka Sorkar Jylla u Abu Taher Mondal u la pynpaw ïa ka jingsngewkhia halor ka jinghiar ka um ha pung Umïam. Katkum ka jingong jong u, ka jingduna ka um pung Umïam kan ktah shikatdei eh ïa ka jingpynmih bording.
“Ngi kwah ba ka um kan wan kloi ban pyndap ïa ka pung. Nga kham sngewkhia bha ma nga ban ïa phi,” la ong u Mondal haba jubab ïa ka jingkylli ha ka jingïakren bad ki lad pathai khubor ha ka sngi Baar.
U Myntri u la kdew ba ka jingdap jong ka um ïa mynta ha ka pung Umïam mynta ka dang biang, hynrei ka jinglong jingman ka lah ban kylla katkum ka jinghap jong u slap.
“Kumba ka long mynta ngi dang biang hynrei ngam tip haduh katno u slap un hap. Ha,oid, lada u slap u hap ka long kaba bha ngin sa ïoh kham bun ka um,” u la ong.
U Myntri u la ong ba ka dang kloi palat ban ïathuh lypa lada ka jinglong jingman ba mynta ka lah ban lam wat shaduh u pud ba hap ban pynlip ïa ka bording.
Haba kylli hato ka jingbym don slap ka ktah neem ïa kiwei pat ki projek pynmih bording kynthup ïa ka Leshka, u Mondal u la ong lada slap ka bha, ka um ka don, bad ka jingpynmih bording ka bun, hynrei haba u slap u duna, ka jingpynmih bording ka shah ktah.
U la ai nuksa da kaba ong, “ka Ganol, kaba ka jingpynmih bording kaba heh tam ka long 22.5 megawatt, ha kane ka kynti haba u slap u jur bha, phi la dei ban ïohi ba wat ki jaboh jabaiñ ki la tuid lut sha wah ha Ganol. Ha kito ki khyndiat sngi ngi la lah ban pynmih ïa ka bording haduh 24 megawatt kaba mut .5 megawatt ha ka shi unit ngi la pynmih kham bun. Lada ka bun ka um ngin kham lah ban pynmih kham bun ruh ka bording.”
Shuh shuh u Myntri u la ïathuh ba ka Sorkar ka la thied bad die ïa ka bording lyngba ki lad ki lynti kiba bun.
U la kdew ba ka jingsiew jong ka jylla sha ki bor pynïaid ka Sorkar Pdeng kum ka NEEPCO, NTPC, bad ka Powergrid ka la lah ban pyndep bad la pyrshang ruh ban siew biang ïa ka pisa ba dang sah kaba kot T.664 klur sha ka NTPC haduh u snem 2027.
“Ngi don katto katne ki jingsiew bad ka NTPC kata ka dei ka jingsiew ba la lum ha ki snem ba ladep. Ka la long haduh T.664 klur. Ngi buh thong ba ha u snem 2027 ngin pynkut ïa kata ka jingsiew baroh,” la ïathuh u Mondal.
