Shillong, Nailur, 03: U Nongïalam ka Liang Pyrshah u Dr. Mukul Sangma u la wohnia ïa ka Sorkar Jylla ba kam shym la mang pisa ban shna ïa ki Medical College ha Meghalaya, nalor ka Tura Medical College.
U Sangma u la ïathuh ha ki lad pathai khubor ha ka sngi Balang ba ka jingbym leh eiei jong ka Sorkar ka la pynduhnong, khamtam ha Ri Bhoi kaba mynta kam lah shuh ban ïoh jingïarap na ka Sorkar namar ka jingdon jong ka Medical College ba la pynïaid da ka USTM.
U la pynpaw ruh ïa ka jingsngewsih ba ka Sorkar kam shym la buddien shuh shuh ïa ki jaka pule doktor ha kiwei pat ki district shwa ban wan ka Medical College jong ka USTM kaba la khanglad mynta ïa ka Ri Bhoi ban ïoh ïa ka kolej.
“Ha ka jingshisha, nalor ka Tura Medical College, ngi la ïoh katto katne ka mang pisa hynrei ngi la phiel namarba ka Sorkar ba mynta. Hato ka Ri Bhoi ka dei hok ban ïoh mynta? Ym shuh namar ba phi la don lypa ka hospital shimet bad ka medical college ba la don ha USTM. Phi la khanglad ïa ka lynti lajong. Shwa ka USTM, ngi la dei ban kyntu ïa ka Sorkar India ba kan ai jingïarap ïa ka Meghalaya ha kiwei kiwei ki distrik ba ngin don ïa ka Medical College. Mynta ka Ribhoi ka la shah pynduh noh ïa kata ka jingïarap namar ba ka la don ïa ka kolej pule doktor jong ka USTM,” ong u Sangma.
Da kaba ai nuksa ïa ka jingjop jong ka Assam bad ka West Bengal ban seng ïa ki Medical College bun tylli kiba ïoh mar katjuh ka song pisa, u Sangma u la ong, “ngi la pynslem palat. Lait na ka Tura Medical College, ngi la dei ban don sa katto katne ki Medical College kumba long kiwei pat ki jylla. Phi peit katno tylli ki Medical College ka sorkar Assam ka la ïoh ba la seng da kajuh ka pisa ba la mang da ka Sorkar India. Kumjuh ruh phi ïohi ïa ka West Bengal da kajuh ka jingïarap pisa na ka bynta ban seng ïa ki Medical College ryngkat bad ka Civil Hospital ne ka hospital Sorkar kaba don lang bad ka shlem hikai na ka bynta ki Medical College.”
U Myntri Rangbah barim u la ai jingmut ba ka Jaiñtia Hills mynta kan dei kawei pat ka thaiñ kaba dei hok bad ong, “ka Sorkar Jylla ka dei ban buddien na ka Sorkar India (na ka bynta ka jingai jingbit jong ka kolej pule doktor).”
U la kyntu ïa ka Sorkar Jylla ban pynbeit ïa ka jingeh kaba ïadei bad ka Tura Medical College.
Da kaba ñiew ïa ka jingmynjur jong ka NMC ban sdang ïa ka Shillong Medical College kum ka jingjop kaba khraw, u Nongïalam ka Liang Pyrshah u la kyrpad ïa ka Sorkar ban pynthikna ba kane ka kolej kan pyndep ïa baroh ki kyndon ba la buh da ka National Medical Commission (NMC) khnang ban lait na kino kino ki jingduna kiba lah ban ktah ïa ki samla pule.
“Ha kaba ïadei bad ka Shillong Medical College, ka dei shisha ka jingjop hynrei ka Sorkar ka dei ban leh hok khnang ba kan ym don kano kano ka jingkyndit kaba ap pat ïa ki samla pule. Dei ban don ka jingshai kaba pura shaphang ki jingpyndep ïa ki kyndon katkum ka Checklist khnang ba ha ka por ba la sdang ïa ka jingpule hadien ba ka National Medical Commission (NMC) ka la wan bad leh ïa ka jingjurip kaba bniah ban pynshisha la ka Medical College ka pyndep neem ïa baroh ki kyndon katkum ka Checklist baroh kaba la ai sha ka jylla,” u la ong.
U la ai jingmut ba dei ban peit ba ym don eiei ka ban jia ha kaba ïadei bad kano kano ka bynta jong ka jingjurip kaba lah ban pynpaw ïa kano kano ka jingduna kaba lah ban pynmih ïa ka jingkulmar jingkut ïa ki samla pule.
