Shillong, Naiwieng, 06: Ki dkhot ka Meghalaya Commercial Truck Owners and Drivers Association (MCTO&DA) ki la dawa ïa ka Sorkar ba kan pyllait mardor khlem teh kyndon ïa ki nongïalam jong ka seng kiba la shah kem ha ka step synñia 5 tarik Naiwieng, 2025 ha ka jingïakhih ba la khlem pud sngi ha ka shnong Mawryngkneng, East Khasi Hills District.
Kat haduh mynta ki Pulit ki la kem ïa u President ka MCTO&DA Central Body u Bah Mosklandar Marngar bad ïa u President ka MCTO&DA Jaiñtia Hills Unit u Bah Heibor Pariat bad katto katne ngut ki nongïalam.
Ha ka jingïakren bad ki lad pathai khubor, u President jong ka MCTO&DA, Ribhoi Unit u Bah Moonlight Pyrtuh u la ong katba ka Sorkar kam pat pyllait ïa ki nongïalam, ki nongñiah trok kin dangn ïai bteng beit ïa ka jingïakhih ha kane ka jaka.
“Ngi ïohi ïa ka jingkren jong u Myntri ka tnat Kam Pohing bad u Myntri ka tnat Transport ki long kham kyllaiñ. Ba kin ïoh ïa ka jingshai kaba thikna ngi kyrpad ïa ka sorkar ba kan pyllait shwa ïa ki nongïalam jong ngi khnang ba kan shai lada ki khot ïa ngi sha ka miej jingïakren,” la ong u Bah Pyrtuh.
“Lada kim pyllait ïa ki nongïalam jong ngi, ngim banse ban bteng beit ïa ka jingïakhih katba ki karkhana pynmih dewbilat kim pat ai ha ngi ïa ki jingdawa,” u la ong.
U la ïathuh ba ka jingdawa jong ka seng na ki karkhana pynmih dewbilat ka long ban pyntreikam katkum ka dor T.9 na ka bynta shi kilomitar. “Kane ka dor kaba ngi dawa ka dei ka dor kaba ba la mynjur da ka Sorkar Jylla ha ka 6 tarik, Rymphang, 2020. Ki nongpynïaid jong ki karkhana kim lah ban kular ba kin ai ïa ka jingdawa ha kaba ïadei bad ka kit ka bah bad ka dor ka mur.,” u la ong.
“Ngi la pynsngew ruh ha ki sha ki bynta jong ka jylla ba ki surok kim pat biang ngi la buh lai tylli ki dor: ha ki surok rong ka dor ka long T.9 shi kilomitar, ha ki surok ba siang mawria dawa ba ka dor kan long T.10 shi kilomitar, bad ki surok shrah ne surok khyndew ngi la dawa ban ai T.12 shi kilomitar,” la pynkynnmaw u Bah Pyrtuh.
U la ong ruh lada ka Sorkar ka kwah ban ïakren ïa ki mat ki jura jong ka seng ka sorkar ka dei ban pyllait shwa ïa ki nongïalam jong ka seng. “Ngi kwah ban ai ïa ka kti kamon ka kti ka diang ryngkat ka jingdonlang u President ba ngin dup lah ban pynshai shuh shuh ha kaba ïadei bad ka jingdawa jong ngi.”
Haba kylli, u la ong, “ngi khlem ïakhih pyrshah ïa ka Sorkar ne ïa ki bor synshar district ne ïa ka tnat Pulit hynrei ngi ïakhih pyrshah tang ïa ki karkhana pynmih ïa ka dewbilat bad ïa u clinker.”
U la pyntip ba ka jingshim jong ka seng da kane ka sienjam ban pynlong ïa ka jingïakhih ka long namarba ki nongïalam ka seng ki la ïakynduh la ar sien kynthih ïa ki bor pynïaid jong ki karkhana pynmih dewbilat ryngkat ka jingdonlang u Deputy Commisisoner jong ka East Jaiñtia Hills hynrei ka jingïakren kam poi shano shano ruh.
“Ngim banse, khnang ba kin jubab ïa ngi, ngi la shim da kane ka sienjam,” u la ong.
