Shillong, Rymphang, 13: Ka Meghalaya Powerlifing & Fitness Association ha ka sngi Palei ka la pyntip paidbah ba kan pynlong ïa ka 3rd Meghalaya Power Lifing lane ka jingïakob rah mawser ka ban sa long ha ka 29 tarik Rymphang, 2025 ha ka shnong Umsning, Ri Bhoi District.
Ha ka jingïakren bad ki lad pathai khubor u Treasurer jong ka seng u Bah Robin Kharshandi u la ong ka jingpynlong ïa kane ka jingïakob ka long ruh kum shi bynta ban kyntiew ïa ki khynnah ïalehkai ka Jylla kiba don la ki sap ba kin mih shakhmat ban ïashim bynta.
Ka Association ka khot ka wer ruh ïa ki samla shynrang bad kynthei kiba ju smat ban kilan met na kylleng ka Jylla ban ïashim bynta sha kane ka rynsan ïakob.
Ka Seng ka la pyntip ba kito kiba kwah ban ban ïashim bynta kin hap ban pynrung kyrteng ïalade da kaba siew ïa ka pisa 500 tyngka lyngba ka online bad yn pdiang ruh ban register kyrteng ha ka sngi ba pynlong ïa ka jingïakob.
