Shillong, Jymmang, 03: U Myntri ka Sorkar Jylla uba khmih ïa ka tnat Jngohkai Pyrthei Bah Paul Lyngdoh ha ka sngi Baar u la kular ba kino kino kiba donkti ban pynïap klep ïa ki ar ngut ki shikurim kiba dei ki nongjngohkai pyrthei na Indore, Madhya Pradesh kin ngat beit ha ki kynjri jong ka aiñ.
“Ngim pat lah ban shu pynkut katba ka jingtohkit ka dang ïaid shakhmat. Kaei kaba ladep jia, kiba donkti kin ngat beit ha ka aiñ,” ong u Bah Paul ha ka jingïakren bad ki lad pathai khubor.
Ki Pulit ka jylla ki lap ïa kawei ka wait na ka riat ba jylliew ha kshaid Wei Sawdong na ka jaka ba la lap ïa ka metïap ba la lam pyut jong u Raja Raghuvanshi, uba ryngkat bad ka kurim ka Sonam ki la jahrngai katba ki dang leit kai ‘honeymoon’ sha Sohra.
Ka tnat Pulit ka la thaw ruh da ka Special Investigation Team (SIT) ban pynlong ïa ka jingtohkit halor kane ka jingjia.
Haba kylli, u Bah Paul u la on, “kum u Myntri uba khmih ïa ka tnat Jngohkai Pyrthei, ngi tip ruh ïa ka jingshisha ba uwei u rangbah na Shillong u la jah rngai ha Thailand mynta la 8 bnai eiei bad kam mut ba ka Thailand kam long satia kaba shngaiñ ïa ki nongleit shang suwari. Baroh ki jaka jngohkai pyrthei na ka jingïatuid ki nongjngohkai, ka lah ban don kano kano ka jingjia, ne wat ki kam runar ruser bad kata kan long tang kum uwei u phngiat ha ka jaka kaba ïar.”
U la kdew ruh ïa ka jingai sakhi jong ki briew na kylleng, kiba dei ki YouTuber bad kiba la leit ruh sha Sohra da kaba ong, “ki la ai sakhi ba ka Meghalaya ka dei ka jaka kaba shngaiñ bad kaba ki trai shnong ki burom bha ïa kiba nabar. Namarkata, kawei ka jingjia kam mut ba phin shu airong iong ïa baroh kawei ka jylla da ujuh u brut.”
Halor ka jingjia ïa ki shi kurim na Indore, u Myntri u la ong, “ngim pat tip, ka jingtohkit ka dang ïaid shakhmat. Ïa kawei pat ka lanot ym pat lap dien haduh mynta.”
“Kaba nga lah ban ong ba ka kam jngohkai pyrthei ka dei kaba kiew bha bad kan nang kiew shuh shuh. Ngi la buh ïa ki nongïalam lynti ïa ki nongjngohkai ban pynthikna ba kin don ha baroh ki jaka jngohkai ha ka thaiñ Sohra hynrei nangta ka tnat
bad ka Sorkar kam lah ban lah pat ban pynbor ïa ki nongjngohkai ban pyndonkam ïa ki nongïalam lynti namarba ki don ka lad ba kin pan jingïarap lane kim pan,” u la bynrap.
