Shillong, Nailar 16: U Myntri Rangbah ka jylla u Conrad K Sangma u la ong ba ka Meghalaya ka la ïaibteng ban long ka jylla kaba shongsuk shongsaiñ bad kaba long ruh ka jylla kaba biang bha na ka bynta ki kam pynroi bad bad ki kam khaïi.
Haba kren ha ka jingrakhe ïa ka Independence Day ha Shillong ha ka sngi Thohdieng, u Sangma u la ong ba ka jylla ka la leh ïa ka kam kaba kongsan ban pynbeit ïa ka jingïakajia pud kaba dei ka kam kaba la slem bad ka jylla Assam, kaba la long ruh lyngba ka Memorandum of Understanding (MoU) hapdeng kine ki ar jylla.
“Hadien ka jingïalang jong ngi ki arngut ki Myntri Rangbah la lah ban thung ïa u mawpud hapoh ka thaiñ Hahim bad kane la lah ban pyndep, bad ka la don pat ka jingtreikam kaba sted na ka bynta kiwei pat ki jaka,” u la ong da kaba bynrap, “Kane ka pyni ïa ka jingïaid shakhmat ki kam ban shim ki rai bad ki jingïatreilang kiba neh hapdeng ki ar jylla kiba marjan.”
U Sangma u la pynbna ruh ba ka Meghalaya ka la pyntreikam pura ïa ki criminal law kiba thymmai, da ka jingai ki jinghikai ïa ki pulit ophisar, bad ki nongbishar ban pynkhlaiñ shuh shuh ïa ki nongrim jong ki kam bishar bad ki hok ha ka jylla.
“Ki aiñ ba thymmai halor ki kam runar ki la treikam pura, ha kaba manla ki pulit ophisar, prosecutor, bad ki judge la hikai ba kin pyndonkam bha ïa ki,” u la ong.
U la pyntip ba ka technology kum ka e-Sakshya bad e-FIR ka la pynlong ïa ka jingbishar kaba hok ban treikam khamkloi bad kaba suk ban pyndonkam, ha kajuh ka por ki mobile forensic van bad ka kynhun ki riew shemphang mynta ki la poi sha manla ki district.
Mynta ka Directorate of Prosecution ka la don, ban pynthikna ba hadien ba ki kam runar ki jia, ka jingïoh jingbishar hok kam dei tang ka jingkular, hynrei kan shim ïa ka bynta kaba donkam, u la bynrap.
