Shillong, Naitung, 04: U nongïalam ka BJP uba dei ruh u Myntri Sorkar Bah AL Hek ha ka sngi Thohdieng u la pynpaw ba ka ladei ka por ba ka Assam bad ka Meghalaya kin wanrah ïa ki lad ki lynti kaba neh junom ban pynkut noh ïa ka jingïakajia pud kaba la slem bha hapdeng kine ki ar tylli ki jylla.
Ha ka jingïakren bad ki lad pathai khubor, u Bah Hek u la ong ba ïa ka kam ïakajia pud hapdeng kine ki ar tylli ki jylla la ïakren ha ka kyrdan jong ki Myntri Rangbah ka Assam bad Meghalaya.
“Hynrei ka la dei ka por (na ka bynta baroh ar tylli ki jylla) ban wanrah ïa ki lad ki lynti kiba neh junom ban pynsangeh noh ïa kane ka kam,” u la ong
Katkum ka jingong jong u, ka jingïapynbeit pud kan weng haduh katta katta ïa ki jingeh ba ki briew kiba sah ha khappud ki la ïakynduh la bun bun snem.
“Dei na kata ka daw ba ngi kwah ban don ka jingpynkut noh kaba neh junom ïa kane ka jingïakajia pud na ka bynta ka jingmyntoi jong ki paidbah na baroh ar tylli ki jylla,”, u la bynrap.
Hynriew tylli na ki 12 tylli ki jaka kiba don jingïakajia la lah ban ïapynbeit haduh mynta bad ka wat kaba ar jong ka jingïakren pynbeit pud hapdeng ki ar tylli ki jylla ka dang ïaid na ka bynta ban poi sha kajuh ka jingpynbeit ha kaba ïadei bad ki bynta kiba dang sah jong ka jingïakynad.
