Shillong, Naiwieng, 10: U Superintendent of Police jong ka East Khasi Hills Bah Vivek Syiem ha ka Lah Sngi u Blei u la pyntip ba ka jingtohkit halor ka jingshah pynïap jong u heprit Kyrshanbor Kharmyndai, 7 snem ka rta ha Mawpat, ka dang ïaid shakhmat.
“Ka dei ka jingjia kaba kyllaiñ bha. Ngi la ïoh pdiang ka kaiphod postmortem. Ngi dang ap mynta sa ïa ka kaiphod Frensic ban ïoh ksai shuh shuh,” la bynrap u SP.
“Ïa mynta, ngan ym lah ban ong eiei bad ka Special Investigation Team (SIT) ka dang don hapdeng ka jingtohkit bad ban ithuh ïa kiba donkti ban pynïap ïa une u heprit,” la ong u SP.
Haba kylli, u SP u la ong, (katkum ka kaiphod post mortem), une u heprit u ïap na ka daw ka Asphyxia.
Ha kaba ïadei bad ka jingïap jong i heprit Insaphira Lyngdoh Mawnai, 4 snem ka rta, u SP u la ong ba katkum ka jingtohkit la lap ba dei u khynnah 13 snem ka rta uba donkti ban pynïap.
“Ka la kham shim por katto katne namarba u nongshah kynnoh u dang dei u khynnah rit bad ym lah ban kheiñ ïa u kum u runar uba la heh ka rta,” la ïathuh u SP.
U la ong ruh ba une u khynnah 13 snem mynta u don hapdeng ka jingkhmih jong ka Child Welfare Committee bad ïa ka jingtohkit bad ka jingeksamin ïa u ki Pulit ki ladep leh.
“Namarba ngi la ïoh jingbit, ngi la hap ban eksamin ïa une u khynnah ryngkat ka jingdonlang jong Councellor. Ngi thikna ba dei tang une u khynnah marwei uba donkti,” la bynrap u SP.
“Naduh kaba sdang ngi la thikna ba u dei tang ma u hi marwei uba don bad i heprit haba i la khlad. I heprit 4 snem i la khladnoh na ka daw ka jingngam jyllop bad ngi la hap ban pynthikna ruh la ka dei kaba pynïap khnang lane kaba shu jia aksiden bad kham hadien ynda ngi la bishar shuh shuh ngi shem ba ka dei ka jingshah pynïap,” la ïathuh u SP.
“Mynta ngin hap ban ïaid shuh shuh shakhmat ban pynthikna la u don neem da kawei pat ka jingmut ba sniew ban leh be-jot. Watla kam don kano kano ka dak ban jrong kti ïa i heprit hynrei ka don pat ka jingthmu bad kata kan kham shimpor namarba ngi la ïoh lum ruh ïa ki sakhi sabut ba une u khynnah u dei uba ju mlien ban peit bha ïa ki phlim dakaid,” la ïathuh shuh shuh u SP.
