La jan dap shi bnai shiteng ba ki paidbah jong ka jylla Meghalaya ki la ap khmih lynti ïa ka Result jong ka Lok Sabha Election 2024 hadien ba ki la thep ïa ka vote jong ki ha ka 19 tarik Ïaiong 2024. Bad dei ha ka 4 tatik Jylliew 2024 ba la khyllie ïa ki EVM na ki jaka ba la buh kyrpang ïa ki ban niew ïa ka vote jong ki 6 ngut ki kyrtong jong ka Shillong Parliamentary Seat. Ha katei ka sngi ngi la ïoh sngew tang kawei ka sur kaba sawa jam, tang ka wei ka lama kaba la kaweh bad tang kawei ka phawar kaba la pyrta ha ki shnong ki thaw, ki dong ki kyntoit naduh na sor shaduh nongkyndong bad wat ha ki jaka khappud jong ka jylla, bad kata kadei ka jong ka Voice of the People Party (VPP) kaba la ïoh ban rah ïa ka nam jop lyngba ka jingïoh vote jong u kyrtong jong ka u Dr. Ricky A. J. Syngkon.
Kane ka jingjop ka long kaba phylla bad kaba pher haduh katta katta na ki MP Elections kiba la dep. Ka la wanrah ka burom kaba khraw ïa ka party VPP bad ïa ki Nongïalam jong ka bad khamtam eh ïa ki nongkyrshan jong ka ha man la ki constituency. Mano ban poi pyrkhat ba u kyrtong jong ka u bym ju don bynta ha ka kam politics mynno mynno ruh un poi haduh kane ka kyrdan? Mano ban khmih lynti ba ka party kaba dang lung bha ka rta tang hapoh ar snem ka la lah ban sei saw ngut ki MLA bad ha kane ka kynti ka la ïoh khur ïa ka nam jop ïa u kyrtong MP uba ka pynieng? Mano ban mutdur ba dei na kane ka party ba yn pynmih ïa rangkynsai u ban mihkhmat sha ka ingdorbar thaw aiñ jong ka ri India u ban ieng ban kren na ka bynta u paidlang jong ka bri u Hynniewtrep? Mano ban poi kynmaw ba ka jingkyrshan ba radbah jong ki paidbah ïa kane ka party yn thaw syndon ïa ka khana sah kynmaw ha ki pateng ban wan baroh? Ka jubab ka long ba wei ba u paidbah u la kut jingmut da kaba skhem ban rai, ban shaniah bad ban pynkhamti ïa ka bor bad ka lyngkor, yn nym don ba lah ban khang.
Kawei na ki jingpher jong kane ka MP Election mynta u snem ka long ba ha kane ka kynti kaba mynta, ngi la ïohi ïa ka jingkyrshan kaba radbah jong ki paidbah ka Ri Khasi ym kumba ki ju leh ha ki snem kiba la leit. Kumba ngi ïohi lyngba ki lad pathai khubor, ngim artatien ba ka jingshngaiñ jong kane ka MP Election ha ka jylla jong ngi khamtam ha Shillong PC kadei na ka daw ka jingpynieng kyrtong jong ka VPP. Ngi lah ban ong ba ka jingpoi ki nongthep vote kaba la kot haduh 76 na ka shi spah ka dei ka sakhi ïa ka jingkloi jong ki ban ïa shim bynta ha ka jingjied nongmihkhmat kaba heh tam ha ka Ri India bad ha ka pyrthei hi baroh kawei. Nalorkata ngi lap ruh ba ha kane ka Election, ki paidbah kim lehraiñ ban ïathuh ïano ba ki kyrshan wat hadpeng ka por ba ki dang ieng ban leit thep vote ha ki polling station.
Ngi ïohi ruh ba ka vote ba U Dr. Syngkon u ïoh da kaba tam haduh 3.71 Lak ka la thaw syndon ïa ka histori ha ka kam election ha ka jylla bad kaba lehse kan rung ruh ha ka histori jong ka thaiñ shatei lam mihngi jong ka ri India. Kaba phylla ka long ba wat haba la khein lang ïa ka jingïoh vote jong kiwei ki kyrtong, hynrei kim shym lah ban kot ïa ka vote ba u Dr. Syngkon u ïoh marwei. Kane ka kdew shibun kiei kiei kiba lah ban long ki daw jong kane ka jingjop kaba khraw bad ka pyni ruh ba u paidbah nongthep vote u don kawei ka sur bad kawei ka rai na ka bynta ka ri bad ka jaidbynriew da kaba khniot ryntih ïa u budam jong ka VPP ha ka EV Machine.
Kane la la dei shisha kata ka ‘Historic Win’ lane ka jingjop ka ban sah nam bad sah jingkynmaw junom ha ka histori jong ka synshar khaddar ha ka jylla bad ka la urlong namar ki daw kiba bun. Ka jingjop jong ka VPP la la pynkut ïa ka jingjop lynter jong ka Congress party kaba la bat ïa ka shuki MP na Shillong da ki phew snem. Ka result ka ïathuh ruh ba ki paidbah ki la rai ban pynkut shi syndon ïa ka jingkyrshan jong ki wat ha ki constituency jong ki MLA badei na ki party kiba pynïasoh ïalade bad ka sorkar MDA ruh. Kane ka pynpaw ba ki la duh ïa ka jingshaniah ha kine ki MLA bad ki party ba ki mih.
Kawei na ki daw ba ha khmat eh ka lah ban long ka jingmih jong ka VPP kum ka party kaba don ïa ka nongrim kaba skhem kaba u paidbah u la angnud la bun phew tylli ki snem. Nangta pat ka wan sa ka jingkut jingmut jong u paidbah ban wanrah ïa ka synshar khadar kaba khuid da kaba ailad ïa ka VPP ban ïoh ïa ka jingjop kaba donburom. Ngi lah ruh ban ong ba ka jingijli jong u paidbah ïa ka bamsap ha ka ri jong ngi ka la poi haduh u pud ba ki la rai ban jied ïa ka VPP ban lam khmat ban pynkhuid ïa ka jingkynrei jong ka. Ka jingdom jong ki paidbah ïa ka sorkar MDA ka la paw shai ha ka result kat haduh ba ki don da ki spah tylli ki polling stations bad ki party ka MDA ki ïoh tang 2 ne 3 vote bad ka seng riewlum kiba heh bad ba la sem ruh ki ïoh 0 ne 1 vote na kiba bun ki jaka. Ka result ka ïathuh ruh ïa ngi ba u paidbah u la ngiah ïa ka jingbymler kam jong kiwei ki party kiba la bat ïa ka kyrdan MP la bun snem bad kiba la bat ïa ka synshar khaddar ha ka jylla ruh kumjuh.
Ngi ïohi ïa ka jingshah kynthoh jong ka VPP hapdeng ka jingïalap Elekshon ha kiwei pat ki party haduh ba ka campaign ka la khluit haduh katta katta hynrei ka jingjop jong ka ha kane ka rukom ka la theh umpjah lut ïa kine baroh. Ka result ka pyni ruh ba ka jingrai jong u paidbah ka long kaba skhem triang namar u la pynshong nongrim bha shwa ba un rai bad u la kyntait ïa ka bor jong ka pisa bad ka jingpynbieij ba bun jait. Kane ka pynpaw shai ba u paidbah um bieij shuh bad ym lah ban khein dew thala ïa u ne da kaba khein paidbhur ïa ka jingmih jong u ban kyrshan ïa ka VPP. Kaba kongsan ka long ba u paidbah mynta u la sngewthuh kumno ban jied ïa ki nongïalam kiba mihkhmat na ka party kaba don ki nongrim kiba skhem bad kaba ieng rangbah ban wanrah ïa ka synshar khaddar kaba khuid bad ka synshar paidbah ka bym leh shiliang khmat. Lyngba kane ka rai jong u paidbah, ka la pynlkyndit bad pynshaiong ïa kito ki ba mut ba ka kam synshar khaddar ka dei ka kam khaii kaba lah ban kam trai bad pyndonkam bakla katba mon ban ïoh nong ïalade shimet. Ka burom kaba khraw ka leit sha u paidbah ka ri Khasi.
