Shillong, Lber, 14: Ka jingmih ki kynrum kynram hapoh ka karkhana Shakhambari Ferro Alloy Private Limited kaba don ha ka shnong Riwiang West Khasi Hills District bad ka jingkhang tala ïa kane ka karkhana la ka long da ka bor shnong ne da ki kynhun bapher bapher kam dei shuh kaba dang jia tang ha kine ki sngi hynrei la ong ba ka la ju ïai jia na ka por sha ka por bad bad la ong ruh ba bun na ki jingjia ki mih tang namar ka jingbymïabeit bad ka jingbymïahun jongno re jongno.
Dang ha ka 13 tarik, Lber, 2025 la sakhi ruh lyngba ki video kiba la shaphriang ha ka social media ba ka Dorbar Shnong Riwiang ka la leit ban khang tala noh ïa ka karkhana ryngkat ka jingïadon lang ruh ka kynhun jong ki nongpynhap mar ha kane ka ka karkhana ïa kaba la tip ruh kum ka Supplier Association, ka seng jong ki trai bad ki nongniah trok bad kiwei kiwei.
Kumta ban tip ïa ka daw tynrai jong kane ka jingjia na ka liang ki katto katne ki nonglum khubor ki la pyrshang ban ïakren bad ki bor pynïaid jong ka karkhana hynrei ki la kyntait ai ai jingpynshai ne wat ban kynthoh eiei hynrei hadien la shu ïoh ban ïakren bad u Sordar jong ka shnong Riwiang u Bah W. Ïawphniang ha kaba u la pynpaw ba ka jingleit khang tala ïa ka karkhana da ka shnong ryngkat ki paidbah ka dei namar ka jingbym lah jong ki bor pyniaid jong ka karkhana ban pynbiang ïa ki jingdonkam jong ka shnong katkum ki jingïakut bad ki jingïateh soskular naduh ki por ba mynshwa ban pynbiang ïa ki jaka ai jingsumar bad kiwei de ki kam pynroi nalor ka pynkhuid ia ki jaboh jabaiñ bad u Sordar u la pynpaw ruh katba ki bor pyniaid jong ka Karkhana kim lah ban ïa pynbeit bad ka dorbar shnong ryngkat ki nongshalan mar ia ka karkhana yn ym pat shah satia ban plie.
Hynrei ka thymmei khubor kaba ïajan bad kane ka jingjia ka la ïathuh ba ka daw tynrai kaba pynlong ia ka dorbar shnong bad ia ka seng ki nongpynhap mar ha ka karkhana ka long namar ka jingpynslem jong ki bor pyniaid ka karkhana ban siew dep ïa ki Bill lane ki pisa bai mar ba kynthup ïa u dewïong, u rnga, u mawleiñ bad kiwei kiwei ïa kaba la kynnoh ruh ba ki lah ban dei ki mar ba la shu khaïi beaiñ hapoh ka karkhana.
Ym lah ruh ban len ba ka jingjakhlia bad ki jaboh jabaiñ kiba mih na ka karkhana Shakhambari Ferro Alloy Private Limited ka la ktah haduh katta katta ia ki paidbah nongshong shnong bad kumjuh ïa ki sawdong sawkun jong ka meimariang bad kane ka sienjam jong ka shnong Riwiang lada ki pyndonkam hok shisha ïa ka bor bad iktiar lehse kan long ka jingmyntoi ïa ka shnong baroh kawei hynrei lada ka jingjia kan shu ïai long kumba la jia ha ki por ba ladep lehse kan shu long tang kum ka jingshah pyndonkam ha kiba don da kiwei pat ki jingthmu ne kiba kwah ban ioh jingmyntoi shimet.
