Shillong, Risaw 10: Ka Hynñiewtrep Youth Council (HYC) ha ka sngi Thohdieng ka la ther tyngeh ïa u Symbud Myntri Rangbah ba khmih ïa ka tnat Kam Pohïing (Police) Bah Prestone Tynsong namar ka jingkynnoh bynshet kylla ha ki kmie ki kpa ban ïada bad ai jingshngaiñ ïa la ki khun.
Ha ka kyrwoh khubor na ka liang ka HYC ka la pynpaw ba ki jingkren jong u Symbud Myntri Rangbah ki long kiba ym don ka jingkitkhlieh, ki ktien ba kren khlem ka jingsngewthuh, bad kaba pynkyndit bad ki bym ïahap bad ka kyrdan kaba u bat ban khmih ïa ka shongsuk shongshngaiñ.
Ka HYC ka pynpaw ïa ka jingsngewsih da kaba ong ba ha ka jaka ban pan jingïatreilang na baroh ki liang u Symbud Myntri Rangbah u khynñiat kylla sha ki nongshong shnong ka Jylla.
Halor kane na ka liang ka HYC ka la ong, “Ngi pynrem ïa ka jingkren ba la kren bad ïa u briew uba la kren ïa ka bad ngi kwah ban pynkynmaw ïa u Symbud Myntri Rangbah ba ka dei ka kamram jong ka Sorkar Jylla ban pynthikna ïa ka jingshngaiñ jong ki nongshong shnong bad lada ka Sorkar kam lah ban ai jingshngaiñ kam don hok shuh ban synshar ïa ka Jylla.”
Ka HYC ka la pynpaw ba ki paidbah ka Jylla ki im ha ka jingtieng, jingsyier bad jingsngewsih hadien ki jingshah pynïap ki khynnah ba dang shen, bad kaei kaba ki dawa ka long, ka jingpynthikna na ka Sorkar ba ki khun jong ki kin lait na ki jingma bad ba ki nongleh kam sniew kin shah pynshitom katkum ka aiñ kaba don.
Na ka liang ka HYC ka la pynkynmaw ruh ïa u Symbud Myntri Rangbah ba ka tnat pulit ka dei ka bynta jong ka jingsynshar, bad ki paidbah kim lah ban shim ïa ka aiñ ha la ki jong ki kti. “Hynrei lada ka Sorkar ka sngew ba ka jinglong jingman jong ka aiñ ka long shabar ka bor jong ka, te lehse ka dei ban pyrkhat ban aiti ïa ka kam pulit sha ki paidbah nongshong shnong,” ka la bynrap.
Shuh shuh ka Council ka kyntait ruh ïa ka jingai jingmut jong u Symbud Myntri Rangbah ba ki kmie ki kpa ki dei ban sumar bad peitngor ïa ki khun, da kaba pynpaw ba ym baroh ki kmie ki kpa ki don ïa ka por ban buddien ïa ki khun 24/7 kynta, khamtam ki kmie ki kpa kiba hap ban bylla ban pyndap pynbiang ha la ïing.
Halor kane ka la ong, “Kumta, ban ong ïa ki kmie ki kpa ba kin peitngor bad sumar ïa la ki khun namar ka jinglong jingman kam biang hapoh ka Jylla ka dei ka jingpyrshang jong ka Sorkar ban kyntait ïa la ka jingkitkhlieh, ban duna ki kam pyntriem khnang ba ka Sorkar kan ïoh ïa ka burom.”
