Da u Rev. Edwin H. Kharkongor
Haba u briew shimet lane ka kynhun jong ki ‘riew-shimet ki pynïasoh bad ka Seng Saiñ-pyrthei, ngim don eiei ban ong halor kata. Hynrei haba ki nongmihkhmat paitbah ki kynthih-diengkper noh ban leit ïasnoh bad kawei pat ka Seng Saiñ-pyrthei na kaba ym shym la jied ïa ki ha kaba sdang, kata te ka long ka jingshet shukor kaba sniew bad pynkthang ïa ki paidbah kiba la jied ïa ki kum ki nongmihkhmat ha kaba nyngkong! Kane ka dei ka jingpynskhem shaphang ka jinglong jong kine ki MLA, kata, ïa ka jingrhah buid bor bad jingthrang kynrei ïa ka jingsngew ïohnong bad jinghun shimet jong ki, ban ïa ka jingsngewkhia kitkhlieh jong ki ban noh synñiang sha ka synshar khadar kaba bha na ka bynta ka jingbha lang jong ki nongshong-shnong ki babun bad ka Jylla hi baroh kawei.
Ka Seng BJP ka kyrshan ïa ki kynhun bunpaid, bad la ïohi ruh ïa ka jingsngapjar bajam jong ka ha kiba bun kiei kiei – kum ha ka jingïa-umsnam hapdeng ki kynhun jaitbynriew ha Manipur, ka jingsngapjar kaba pynshlur ïa ki jingkren kiba tei ïa ka jingshun (hate speeches) ryngkat bad ki jingleh jubor pyrshah ïa ki Khristan bad kiwei de ki kynhun ritpaid ha ka ri. Haba ka wanrah pat ïa ki Skim pynroi ha ka ïoh ka kot bad ka bha ka miat, ka Seng BJP ka kyntiew ïa ka phang “Kawei ka Ri, Kawei ka Ktien, Kawei ka Niam – One Nation, One Language, One Religion” bad kiwei de ki rukom pyntreikam kiba buh jingma ïa ka jingriewspah ki jinglong bapher bapher kiba kynthup ïa ki kynhun trai-ri, ki ‘riewlum, bad ki ritpaid kylleng kylleng.
Ha Meghalaya la ithuh ïa ka BJP kum ka Seng kaba leh donbor ha ka saiñ-pyrthei. Wat haba kam shym ïoh ïa ka jingjied jong u paid ka Jylla, kane ka Seng ba tang arngut ha ka Ïing Dorbar Thawaiñ, la i kumba kane ka Seng ka la lah ban leh bor halor katto katne ki phang treikam jong ka Sorkar. Mynta pat ha kane ka por, kane ka Seng rongsoh ka la don ka jingsngewthuh ba ka la ïoh ka jingskhem ba shongaiñ na kine ki MLA kiba la shah pyngngop bad kylla lyndang ha ka duwan jong ki jingpynshoi bad jingshah pynbieij. Na ka bynta katto katne ki sbai rupa bad ki jingthaba phyrnai ba shi khyllipmat ha ka rynsan nongwei, kine ki MLA ki la pynkheiñ bad pynduh noh ïa ka jingshaniah jong ki paidbah nongjied ha la ki shnong lajong, bad ki la long lyngkhuit bad duh noh ïa la ka jong ka burom bad ka akor jong ki.
Mynta ka la dei ka bynta jong ki paidbah nongthep vote ha kine ki Konstitwensi ban pynpaw ïa ka jingstad, ka hok bad ka bor jong ki da kaba sloit noh ïa kane ka kyrdan nongmihkhmat paidbah na kine ki ‘riew saiñ-pyrthei kiba beh ïa ka khwan myntoi shimet.
